“Chorsu” mehmonxonasi o’rniga $170 mlnlik yangi bino quriladi

2-noyabr kuni Toshkentda bo‘lib o‘tgan matbuot anjumanida Chorsu maydonini rekonstruksiya qilish loyihasi taqdim etildi. 

Loyiha Germaniyaning “Tchoban Voss Architekten” kompaniyasi tomonidan ishlab chiqilgan. Loyiha doirasida yangi mehmonxona, biznes-markaz va turar joylar barpo etiladi. 

Bu loyihada 2025-yildan qurilish ishlari boshlanib, 2029-yilgacha yakunlanishi rejalashtirilgan bo‘lib, umumiy qiymati $170 mlndan ko’proqni tashkil qiladi.

Rekonstruksiya jarayonida tashlandiq holdagi “Chorsu” mehmonxonasi binosi buziladi. Ammo, nemis arxitektorlari tomonidan loyihalashtirilgan yangi majmua sobiq “Chorsu” mehmonxonasining umumiy konturini saqlab qoladi va hududning meʼmoriy dominantiga aylanadi. Binolardan birida mehmonxona tarixi va uning Toshkent arxitekturasida tutgan o‘rniga bag‘ishlangan muzey ochiladi.