Bitkoin narxi $92 mingdan pastladi

18-noyabr kuni birinchi kriptovalyuta narxi pasayishda davom etdi va $92 mingdan pastga tushdi. Bu haqda Yahoo Finance tahlil qilgan savdo ma’lumotlarida qayd etilgan.

Bitcoin (BTC) bosim ostida qolmoqda va $92 mingdan past narxda savdolashmoqda. Oktabr oyida qayd etilgan rekord darajadan hozirgi pasayish 26%dan oshdi. Manba ma’lumotlariga ko‘ra, bu tushish vaqtinchalik korrektsiyami yoki yangi to‘rt yillik siklning boshlanishi — ya’ni uzoq muddatli pasayish bosqichi — ekaniga oid savollarni tug‘dirmoqda.

Nashr ma’lumotlariga ko‘ra, token narxining keskin tushishi o‘tgan oy $19 mlrd kredit pozitsiyalari majburan yopilgandan keyin sodir bo‘lgan. Bundan tashqari, uzoq muddatli investorlar ham foyda olish uchun aktivlarini sotishni boshlagan. Hozirgi pasayish Bitcoin tarixan cho‘qqiga chiqadigan davrga — ya’ni 2024-yil aprelidagi halvingdan 400–600 kun o‘tgan vaqtga — to‘g‘ri kelmoqda.

Bernstein analitiklari o‘z hisobotida bu jarayonni “o‘zini o‘zi amalga oshiradigan bashorat” deb atashdi, bu esa 2025-yilning to‘rtinchi choragida bozorda sotuvlar kuchayishiga olib keldi. Biroq ular o‘zlarida mavjud ma’lumotlar Bitcoin bozorida qisqa muddatli konsolidatsiya va yangi lokal pastki nuqta shakllanayotganini, avvalgi sikllardagi kabi 60–70%lik tarixiy qulash kuzatilmayotganini ta’kidlamoqda.

Bernstein shuningdek, institutsional investorlar tomonidan ETF (birja fondlari) orqali Bitcoin’ga sarmoya kiritish kengayayotganini qayd etdi. Bu esa aktivga nisbatan “yanada sifatli va barqaror egalik” shakllanayotganini ko‘rsatadi. Trump ma’muriyatining Bitcoinni qo‘llab-quvvatlashi hamda Kongressdagi Clarity Act qonun loyihasi ham bozor uchun ijobiy omillar sifatida tilga olinmoqda.

Bernstein vakillarining ta’kidlashicha, hozirgi bozor muhiti tsiklning cho‘qqisiga o‘xshamaydi. Ular buni institutsional investorlarning Bitcoin va kripto bozorlarida yildan yilga ortib borayotgan ishtirokiga asoslangan ko‘p yillik strukturaviy trend deb bilishadi, va bozor davriy tuzatishlardan o‘tib turadi. Analitiklar Bitcoin $80 ming atrofida — Trump saylovlaridan keyin kuzatilgan daraja — pastki nuqtani yana qayta sinab ko‘radimi-yo‘qmi, kuzatib bormoqda. Ularning fikricha, hozirgi bozor zaifligi yangi investorlar uchun qulay kirish nuqtasini yaratishi mumkin.