O‘zbekistonda avtomobil savdosi oktabrda qayta faollashdi

Oktyabr oyida respublikada sotilgan avtotransport vositalarining umumiy soni 112,5 mingtaga yetib, o‘tgan oyga nisbatan 11% ga oshdi. Bu haqda Iqtisodiy tadqiqotlar va islohotlar markazi hisobotida aytiladi.

Oktyabrda bozorning barcha segmentlarida o‘sish kuzatildi. Eng katta o‘sish yengil avtomobillar sektorida qayd etildi — ko‘rsatkich 12,7% ga oshib, 95,4 ming donaga yetdi. Hududlar kesimida Namangan, Jizzax va Buxoro viloyatlari yuqori dinamikani namoyish etdi — bu hududlarda savdo 20% dan ortiq oshgan. Faqat Samarqand viloyati va Qoraqalpog‘istonda biroz pasayish kuzatildi.

Yengil avtomobillarning birlamchi bozorida savdo deyarli 19% ga oshdi, bu miqdoriy jihatdan qo‘shimcha 6 ming avtomobilni tashkil etadi. Yangi mahalliy avtomobillarga bo‘lgan talab 22% ga oshib, 33,4 ming dona bo‘ldi. Chet el avtomobillari esa nisbatan sust dinamikani ko‘rsatdi — atigi 1,1% o‘sish bilan 4,5 ming donaga yetdi.

Ikkilamchi bozor ham ijobiy tendensiyani namoyish etmoqda: oldi-sotdi bitimlari soni 9% ga ko‘payib, 57,4 mingtaga yetdi. Ayniqsa, ishlatilgan elektromobillar segmenti e’tiborga molik — bu yerda savdo hajmi 3 ming donadan oshdi. Bu sentyabr oyiga nisbatan 15,2% ko‘p, o‘tgan yilning shu davriga qaraganda esa 2,3 baravar yuqori ko‘rsatkichdir.