O‘zbekistonda Shimoliy Afrika va Yaqin Sharq davlatlariga import bojlari bekor qilinadi

Shavkat Mirziyoyev 1-dekabr kuni O‘zbekistonda qurilish materiallari sanoatini rivojlantirish bo‘yicha chora-tadbirlarni tasdiqladi. Prezident qarori Lex.uz saytida e’lon qilindi.

Yiliga ishlab chiqariladigan qurilish materiallari hajmini 62 trln so‘mga, eksportni esa $1,5 mlrdga yetkazish vazifasi qo‘yilgan. Ekologik toza va energiya tejamkor materiallar ishlab chiqarishga, shuningdek, ularning xavfsizligi ustidan nazoratga alohida e’tibor qaratiladi.

Qurilish materiallari uchun zarur bo‘lgan import xomashyosi 2028-yil boshigacha bojxona bojlardan ozod qilinadi. Jahon savdo tashkiloti bilan ishlash bo‘yicha idoralararo komissiya ikki hafta ichida xomashyo turlarining ro‘yxatini tasdiqlaydi.

2027-yilgacha Shimoliy Afrika mamlakatlari (Marokash, Jazoir, Tunis, Misr), Saudiya Arabistoni, Qatar va Mo‘g‘ulistondan olib kiriladigan tovarlarga qo‘llaniladigan bojlar bekor qilinadi. Mahsulot kelib chiqishi haqidagi sertifikatlarni o‘zaro tan olish yo‘lga qo‘yiladi.

Qurilish materiallari sohasida umumiy qiymati $3,5 mlrdlik yangi loyihalarni ishga tushirish rejalashtirilgan. Bosh vazir o‘rinbosari Jamshid Xo‘jayev hokimliklar va Qoraqalpog‘iston Vazirlar Kengashi bilan birgalikda bir oy ichida ushbu loyihalarning umumiy parametrlarini belgilashi lozim.

Chegara qo‘shinlariga “Termiz” o‘tkazish punkti orqali o‘zbekistonlik korxona vakillarining Afg‘oniston chegarasidan xavfsiz o‘tishini ta’minlash topshirildi.

Shuningdek, qora metallar va ularning prokatini (TN VED 7210) eksport qilish tartibi soddalashtiriladi. Endi bu mahsulotlar valyuta tushumi talab qilinmaydigan (oldindan to‘lov, akkreditiv, bank kafolati yoki eksport sug‘urtasi talabi bo‘lmagan) tovarlar ro‘yxatidan chiqariladi.