Yakka tartibdagi tadbirkorlar energetika qoidabuzarliklari uchun yuridik shaxslar bilan teng javob beradi

Oliy Majlis Senati matbuot xizmati xabariga ko‘ra, yakka tartibdagi tadbirkorlar endilikda energiya resurslaridan samarasiz foydalanish uchun yuridik shaxslar bilan bir xil javobgarlikka tortiladi.

Senatorlar energetika sohasidagi huquqbuzarliklar uchun javobgarlikni kuchaytiruvchi qonun loyihasini ko‘rib chiqdilar. Unda elektr, gaz va suv tarmoqlariga o‘zboshimchalik bilan ulanib olish hamda resurslarni o‘g‘irlash uchun javobgarlikni kuchaytirish nazarda tutilgan.

Qonun loyihasiga muvofiq, YaTTlar tomonidan energiya resurslaridan noo‘rin foydalanish holatlariga nisbatan ham yuridik shaxslar darajasida ma’muriy javobgarlik belgilanishi ko‘zda tutilgan.

Qonun loyihasi muhokamasi chog‘ida qayd etilishicha, 2024-yilda yakka tartibdagi tadbirkorlar tomonidan elektr energiyasidan foydalanishda 17,6 ming, gazdan foydalanishda esa 7,6 mingta qoidabuzarlik holati aniqlangan. Hujjat Ichki ishlar vazirligi va Favqulodda vaziyatlar vazirligiga energiya resurslaridan noo‘rin foydalanish bo‘yicha bayonnomalar tuzish vakolatini beradi.

Davlat mulkini xususiylashtirish

Bundan tashqari, Senat davlat mulkini xususiylashtirishga oid qonun hujjatlariga kiritilgan o‘zgartirishlarni ham ma’qulladi. Ushbu hujjat bo‘sh turgan, samarasiz ishlatilayotgan obyektlarni hamda davlat korxonalarining noasosiy aktivlarini xususiy sektorga tezroq o‘tkazishga qaratilgan. Shu maqsadda Soliq va Yer kodekslari hamda yana 13 ta qonunga o‘zgartirishlar kiritiladi.

Davlat tasarrufidagi bo‘sh yer uchastkalari endilikda hududiy hokimliklarning qarzlariga oid cheklovlardan ozod etiladi. Auktsion orqali xarid qiluvchilar bunday yerlarni hech qanday to‘siqlarsiz rasmiylashtira oladi.

Obyektlar muddatli to‘lov asosida sotib olinganda, yer va mol-mulk solig‘i xaridor to‘lagan summa miqdoriga mutanosib tarzda hisoblanadi.

Shuningdek, yo‘l yoqasidagi bo‘sh hududlardan foydalanish tartibi soddalashtiriladi — bu joylarda xizmat ko‘rsatish obyektlari, mehmonxonalar va savdo-ko‘ngilochar majmualar (TRK)ni qurish imkonini beruvchi master-reja asosida ishlovchi tartib joriy etiladi. Bunday yer toifalarini o‘zgartirish uchun Vazirlar Mahkamasi qarori asos bo‘ladi.