2026-yilda YTT va o‘zini band qilganlar uchun aylanma solig‘i 1% gacha pasaytiriladi

2026-yil 1-yanvardan O‘zbekistonda yillik aylanmasi 1 mlrd so‘mgacha bo‘lgan yakka tartibdagi tadbirkorlar va o‘zini o‘zi band qilgan shaxslar uchun aylanmadan olinadigan soliq stavkasi 1% miqdorida belgilanadi. Bu haqda prezident matbuot xizmati xabar berdi.

Bugungi kunda agar bir kalendar yilida mahsulot va xizmatlarni sotishdan tushgan daromad 100 mln so‘mdan oshsa, YTT aylanma solig‘i to‘lashga o‘tishi shart. Soliq stavkasi aylanmaning 4% ni tashkil qiladi.

Bundan tashqari, YTTlar va o‘zini band qilganlar uchun elektron to‘lovlarni qabul qilish uchun maxsus QR-kodning mavjudligi chakana savdo qoidalarining majburiy talabiga aylanadi.

Integratsiyalashgan raqamli platforma orqali olingan pul oqimlari ma’lumotlari banklar tomonidan kredit berish to‘g‘risida qaror qabul qilishda foydalaniladi.

Prezident Shavkat Mirziyoyev tegishli takliflarni ma’qullab, yakka tartibdagi tadbirkorlar va o‘zini o‘zi band qilganlar faoliyati uchun qulay shart-sharoitlar yaratish chora-tadbirlari to‘g‘risidagi qarorni imzoladi.

Mazkur hujjat bilan 2030-yil oxiriga qadar YTTlar va o‘zini band qilganlar uchun yagona raqamli platformaga ega alohida huquqiy rejim joriy etiladi. U orqali faoliyatni rasmiylashtirish, hisob-kitoblarni boshqarish, soliq to‘lash, chek yaratish va elektron hamyon ochish mumkin bo‘ladi. Hujjatlar elektron kalitsiz imzolanadi.