O‘zbekistonning tashqi savdo aylanmasi $59,8 mlrdga yetdi

2025-yilning dastlabki to‘qqiz oyida O‘zbekistonning tashqi savdo aylanmasi $59,8 mlrdni tashkil etdi, bu esa 2024-yilning shu davriga nisbatan 22,9% ko‘p. Bu haqda Statistika milliy qo‘mitasi xabar berdi.

Umumiy eksport hajmi – $26,68 mlrd, bu 33,3 % o‘sishni ko‘rsatmoqda. Shu davrda import hajmi $33,11 mlrdga yetib, o‘tgan yilga nisbatan 15,6% ko‘paygan. Natijada tashqi savdo balansi $6,42 mlrd miqdorida manfiy saldo bilan shakllandi.

Hisobot davrida O‘zbekiston 206 ta davlat bilan savdo aloqalarini yo‘lga qo‘ygan. Tovar aylanmasi hajmi bo‘yicha asosiy hamkorlar: Xitoy (19,1%), Rossiya (15,7%) va Qozog‘iston (5,8%) bo‘ldi.

Eksport tarkibida tovarlar ulushi 74,7% ni tashkil etdi, jumladan:

• sanoat mahsulotlari – 10,7%;
• oziq-ovqat mahsulotlari va tirik hayvonlar – 7,7%;
• kimyoviy modda va shunga o‘xshash mahsulotlar – 5,7%;
• tayyor mahsulotlar – 4,7%.

Eksportda asosiy o‘rinni nomonetar oltin egallab, uning hajmi $9,89 mlrdni tashkil etdi. Meva-sabzavot mahsulotlari eksporti 39,3% ga oshib, $1,45 mlrd (1,6 mln tonna) ga yetdi. Biroq to‘qimachilik mahsulotlari eksporti 16,6% ga kamayib, $1,84 mlrdni tashkil qildi.

Import hajmi – $33,11 mlrdga yetgan. Uning tarkibida mashina va transport uskunalari – 33,9%, sanoat tovarlari – 15,9%, kimyoviy modda va mahsulotlar – 12,3% ulushga ega.

Tovar va xizmatlar 175 ta davlatdan import qilingan. Asosiy import hamkorlari qatorida Xitoy (30,3%), Rossiya (18,6%) va Qozog‘iston (7,3%) kabi mamlakatlar qayd etilgan.