“Yevroosiyo banki” O‘zbekistondagi sho‘ba korxonasining yopilishiga izoh berdi

Qozog‘istonning “Yevroosiyo banki” O‘zbekistondagi faoliyatini to‘xtatishini haqida izoh berdi.

Bank vakillari bu qarorni “resurslarni Qozog‘iston biznesini rivojlantirishga yo‘naltirish” bo‘yicha ilgari qabul qilingan strategik rejaning mantiqiy davomi sifatida izohladi. Ularning ta’kidlashicha, O‘zbekistondagi investitsiyalarni tugatish masalasi Markaziy bank rasmiy ogohlantirishidan ancha oldin tasdiqlangan.

Qozog‘iston bozoriga e’tibor qaratish bankka yangi loyihalarni amalga oshirish va mijozlar hamda hamkorlar uchun eng katta salohiyatga ega yo‘nalishlarda o‘z pozitsiyasini mustahkamlash imkonini beradi, — deyiladi “Yevroosiyo banki” bayonotida.

O‘zbekiston Markaziy banki 28-avgust kuni “Yevroosiyo banki” (O‘zbekiston) faoliyat litsenziyasi qaytarib olinganini ma’lum qildi. Qaror ustav kapitalining belgilangan eng kam talabga javob bermasligi hamda bank faoliyatiga oid boshqa talablar bajarilmaganligi sababli qabul qilingan.

Ma’lumotlarga ko‘ra, bankning ustav kapitali 200 mlrd so‘mni tashkil etadi. 2023-yil bahorida qabul qilingan qonunga muvofiq, 2025-yildan boshlab tijorat banklari uchun minimal talab 500 mlrd so‘m etib belgilangan.