Prezident O‘zbekistonning YeOTBga a’zo bo‘lishi haqidagi hujjatni imzoladi

9-aprel kuni Shavkat Mirziyoyev O‘zbekistonga Yevroosiyo taraqqiyot bankini ta’sis etish to‘g‘risidagi bitimga qo‘shilishga ruxsat beruvchi qonunni imzoladi. Bu haqda «Xalq so‘zi» xabar bermoqda.

Qonun yanvar oyida Oliy Majlis tomonidan, mart oyida Senat tomonidan ma’qullangan. U mamlakatning xalqaro standartlarga muvofiq faoliyat yuritadigan hamda iqtisodiy va moliyaviy ma’lumotlarni tahlil qiladigan YeOTBda ishtirok etishining huquqiy asoslarini belgilaydi.

Bitimga ilova sifatida YeOTB ustavi tasdiqlanadi. Unda bankning faoliyat turlari, maqsad va vazifalari, funksiyalari, imtiyozlari, ustav kapitali miqdori, unga obuna bo‘lish shartlari, shuningdek, bankni boshqarish tartiblari aks ettirilgan.

Bundan tashqari, YeOTB iqtisodiy vaziyat, moliya bozoridagi ahvol, investitsiya imkoniyatlari, pul-kredit va valyuta munosabatlari, bank sohasidagi qonunchilik hamda valyutani tartibga solish haqidagi ma’lumotlarni to‘plash, tizimlashtirish va tahlil qilish bilan shug‘ullanadi.

YeOTB boshqaruvi raisi Nikolay Podguzov 2024-yil sentyabr oyida bir qator yirik davlatlar yaqin kelajakda bank aksiyadorlari safiga qo‘shilishi haqida xabar bergan edi. Shuningdek, u investitsiyalar, sanoat va savdo vaziri Laziz Qudratov bilan YeOTBning Toshkentdagi vakolatxonasini ochish masalasi yuzasidan muzokaralar olib bordi.