YeOTB O‘zbekiston iqtisodiyoti va dollar kursi bo‘yicha 2028-yilgacha prognoz e’lon qildi

Yevrosiyo taraqqiyot banki (YeOTB) tahlilchilari O‘zbekiston iqtisodiyoti uchun yaqin uch yilga mo‘ljallangan prognozni taqdim etdi.

Bankning asosiy ssenariysiga ko‘ra — jiddiy tashqi zarbalar va “qora oqqushlar” bo‘lmagan taqdirda — o‘zbek so‘mining AQSh dollariga nisbatan kursi 2026-yilda 12 800, 2027-yilda 14 100, 2028-yilda esa 15 100 bo‘lishi kutilmoqda. Milliy valyutani pul o‘tkazmalarining yuqori hajmi hamda oltin eksportidan tushadigan tushumlarning barqaror o‘sishi qo‘llab-quvvatlaydi.

YeOTB prognoziga ko‘ra, O‘zbekiston yalpi ichki mahsuloti 2026-yilda 6,8%, 2027-yilda 6,4%, 2028-yilda 6,3% ga o‘sadi. O‘sishning asosiy drayverlari sifatida pul-kredit siyosatini bosqichma-bosqich yumshatish, investitsiyalar va iste’mol faolligining oshishi, iqtisodiy diversifikatsiya, xomashyo bo‘lmagan eksportni rivojlantirish hamda yirik infratuzilma loyihalarining ijobiy ta’siri qayd etilgan.

Fiskal siyosat byudjet taqchilligini YaIMga nisbatan 3% atrofida ushlab turishga qaratiladi. Bu yondashuv iqtisodiy faollikni rag‘batlantirish bilan birga davlat qarzi barqarorligini saqlashga xizmat qilishi kutilmoqda.

Inflyatsiya bo‘yicha baholarga ko‘ra, narxlar o‘sishi bosqichma-bosqich sekinlashadi: 2026-yil oxiriga kelib inflyatsiya 6,7% gacha tushadi. Bunga nisbatan qat’iy pul-kredit siyosati, energiya tariflarining barqarorlashuvi va so‘m kursining nisbiy barqarorligi sabab bo‘ladi. Iste’mol talabi o‘sishda davom etadi, biroq 2025-yilga nisbatan sekinroq. Jahon bozorlarida oziq-ovqat narxlarining oshishi inflyatsiyaga bosim o‘tkazishi mumkin, ammo umumiy trend dezinflyatsion bo‘lib qoladi.

2027–2028 yillarda dezinflyatsiya davom etadi: inflyatsiya 2027-yil oxirida 5,8%, 2028-yil oxirida 5,2% gacha pasayishi kutilmoqda. Maqsadli 5% darajaga yaqinlashishga pul-kredit siyosatini o‘z vaqtida yumshatish, energiya tariflarining barqarorlashuvi va so‘m kursining mo‘‘tadil zaiflashuvi yordam beradi.

YeOTB tahlilchilari O‘zbekiston Markaziy banki inflyatsiya sekinlashishi fonida 2026-yildan pul-kredit siyosatini yumshatishni boshlashini taxmin qilmoqda. 2026-yil oxiriga kelib asosiy stavka taxminan 13%, 2028-yil oxiriga kelib esa 11% gacha tushishi kutiladi. Bu jarayon iqtisodiyotda kreditlash o‘sishi uchun qulay sharoit yaratadi.