Yanvar oyida eng koʻp ishlab chiqarilgan avtomobil Cobalt boʻldi
Bir oyda qariyb 7 mingta ushbu rusumdagi avtomobil sotuvga chiqarilgan
Фото: Абдумавлон Мадмусаев / Kapital.uz
Oʻzbekistonda 2026-yil yanvarda eng koʻp ishlab chiqarilgan avtomobil Cobalt boʻldi. Bu haqda Statistika qoʻmitasi maʼlumot berdi.
Oʻtgan oyda mamlakatda jami 22 099 dona yengil avtomobil ishlab chiqarilgan. Mazkur koʻrsatkich 2025-yil mos davriga nisbatan 6 846 taga koʻp.
Oy davomida barcha avtomobil kompaniyalarida ishlab chiqarish hajmi oʻsgan. Eng koʻp avtomobil ulushi Cobalt hissasiga toʻgʻri kelgan — 6 993 dona. Taqqoslash uchun, oʻtgan yil yanvaridagi raqam 5 660 dona boʻlgan.
Keyingi oʻrinni Damas egallagan — 3 628 dona. Bir yil ilgari qayd etilgan raqam 2 765 dona edi.
Bundan tashqari, quyida boshqa modeldagi avtomobillar sotuvi ko’rsatilgan:
| Model / Brend | 2026-yil yanvar (dona) | 2025-yil yanvar (dona) | O‘sish (dona) | O‘sish (%) |
|---|---|---|---|---|
| Tracker | 1 900 | 1 334 | +566 | +42,4% |
| Onix | 1 974 | 1 462 | +512 | +35,0% |
| Kia | 2 298 | 1 978 | +320 | +16,2% |
| BYD | 1 352 | 802 | +550 | +68,6% |
| Haval | 1 135 | 373 | +762 | +204,3% |
| Chery | 757 | 594 | +163 | +27,4% |
Maʼlumot uchun, 2025-yilda Oʻzbekistonda jami 257,8 mingta yengil avtomobil ishlab chiqarilgan. “Oʻzbekiston 2030” strategiyasiga koʻra, kelgusi besh yilda bu koʻrsatkich 1 mln donaga yetkaziladi. Xususan, 2027-yilda 550 ming dona, 2028-yilda 700 mingta yengil avtomobil ishlab chiqarish rejalashtirilgan. Mazkur raqamlar 2029-yilga borib 800 mingtaga chiqadi.
Ulashish:
Moliya va biznes haqida ko'proq yangiliklar Telegram kanalda @KPTLUZ
Mavzu bo'yicha materiallar
