Yangi Zelandiya noyabrda $600 minglik investitsiya vizasini joriy etadi

2025-yil noyabr oyida Yangi Zelandiya investorlar uchun yangi immigratsiya yo‘lini ishga tushiradi. Bu haqda IMI Daily nashri ma’lum qildi.

Business Investor Visa bo‘yicha investitsiyalarning minimal miqdori 1 mln NZ dollari (taxminan $600 ming) ni tashkil etadi. Shu bilan birga, kutilgan natijani bermagan amaldagi Entrepreneur Work Visa bekor qilinadi.

Yangi dastur ikki darajada ishtirok etish imkonini beradi:

• 1 mln NZ dollari miqdoridagi investitsiya — vaqtinchalik yashash huquqi beriladi. Uch yil o‘tgach, doimiy yashash huquqiga o‘tish mumkin.

• 2 mln NZ dollari (taxminan $1,2 mln) miqdoridagi investitsiya — tezlashtirilgan tartib qo‘llanadi. Agar investitsiyalar uch yil davomida saqlab qolinadigan bo‘lsa, 12 oy ichida doimiy yashash huquqini olish mumkin.

Ammo kamida besh yil faoliyat yuritgan va besh nafar xodimga ega bo‘lgan kompaniyalarga sarmoya kiritishga ruxsat beriladi. Shuningdek, 25% dan yuqori miqdordagi aksiyalarni sotib olish mumkin. Franshizalar, tez ovqatlanish shoxobchalari, mahalla do‘konlari va boshqa past ustuvorlikdagi sohalar uchun cheklovlar o‘rnatilgan.

Ariza beruvchilar 55 yoshdan kichik bo‘lishi, ingliz tilini IELTS 5.0 darajasida bilishi va oilasi uchun kamida 500 ming NZ dollar (taxminan $300 ming) qo‘shimcha mablag‘ga ega bo‘lishi shart. Shuningdek, ular yiliga kamida 184 kun mamlakatda yashashi talab etiladi.

Ariza topshirish uchun bir martalik to‘lov 12,3 ming NZ dollar (taxminan $7,5 ming) miqdorida belgilangan. Hukumat birinchi yilda 100-150 ta ariza kutmoqda. Batafsil shartlar haqidagi qo‘llanma joriy yilning oktyabr oyida e’lon qilinishi rejalashtirilgan.

Immigratsiya vaziri Erika Stenford tushuntirishicha, tadbirkorlar uchun oldingi dastur past samaradorlik ko‘rsatgani sababli, hukumat endi sarmoya va tajribaga ega investorlarga e’tibor qaratishga qaror qilgan. Ushbu islohot yaqinda “Active Investor Plus” deb nomlangan “oltin viza” dasturidagi o‘zgarishlarni to‘ldiradi. Bu dasturda minimal chegara 5 mln NZ dollarigacha (taxminan $3 mln) pasaytirilgani mamlakatga bo‘lgan qiziqishning oshishiga olib kelgan.