O‘zbekistonda $5 mlnlik kapitalga ega bo‘lgan “Imkon Ventures” venchur fondi ochildi

O‘zbekistonda umumiy kapitali $5 mln bo‘lgan “Imkon Ventures” venchur fondi faoliyatini boshladi. Bu haqda Kapital.uz’ga fond matbuot xizmati ma’lum qildi.

Fond strategiyasi rivojlanishning ilk bosqichlarida — pre-seed va seed bosqichlaridagi texnologik startaplarni moliyalashtirishga qaratilgan. Investitsiyalarning asosiy yo‘nalishlari fintech, sun’iy intellekt, SaaS asosidagi B2B yechimlari, shuningdek, chuqur texnologik loyihalarni o‘z ichiga oladi. Mamlakatdan tashqarida kengayish imkoniyatiga ega jamoalarga ustuvorlik beriladi.

Fond Qatarlik venchur investor, “Imkon Ventures” asoschisi va “Imkon Ventures” boshqaruvchi sherigi Muhammad Xalil hamda Tohir Mirzajonov ishtirokida ta’sis etilgan. Tashabbus Markaziy Osiyo va Yaqin Sharq hamda Shimoliy Afrika mintaqasi (MENA) o‘rtasidagi texnologik almashinuvni mustahkamlash, mahalliy jamoalarni xalqaro innovatsion muhitga integratsiyalashga qaratilgan.

Kelgusi ikki yil ichida jamg‘arma 25 tadan 30 tagacha loyihani moliyalashtirishni rejalashtirmoqda, ularning har biriga $50 mingdan $150 minggacha mablag‘ beriladi. Investitsion jozibadorlik yuqori bo‘lsa, keyingi bosqichlarda ishtirok etish mumkin. Prognozlarga ko‘ra, dasturning amalga oshirilishi 2030-yilgacha 1 mingdan ortiq malakali ish o‘rinlarini yaratishga yordam beradi va O‘zbekistonning raqamli iqtisodiyotini rivojlantirishga ijobiy ta’sir ko‘rsatadi.

Asosiy investor sifatida UzVC — O‘zbekiston fondlari davlat fondi ishtirok etdi. Jamg‘armaning ishga tushirilishi haqidagi e’lon Osiyo taraqqiyot bankining kichik va o‘rta biznesni qo‘llab-quvvatlash masalalariga bag‘ishlangan konferensiyasi doirasida amalga oshirildi.