Yangi Toshkent aeroporti Yangiyo‘ldan 7 km uzoqlikda quriladi

Aeroport Chirchiq daryosi va temir yo‘l o‘rtasida, poytaxt viloyatining ikki tumani hududida joylashadi

Yangi Toshkent xalqaro aeroporti Toshkent viloyatining O‘rta Chirchiq va Quyi Chirchiq tumanlaridagi 1 310 gektar maydonda quriladi. “O‘zbekiston 24” telekanali lavhasida yangi aeroportning joylashuvi Yangiyo‘l shahridan taxminan 7 km sharqda joylashgan.

Qurilish hududining janubiy qismida Yangitosh va Tinchlik aholi punktlari, shuningdek, Yangihayot shaharchasi joylashgan — obyekt qisman Xalqobod mahallasi hududini qamrab oladi.

G‘arbiy tomondan Chirchiq daryosi oqib o‘tadi, sharqiy tomondan temir yo‘l (22 km to‘xtash nuqtasi) o‘tadi, shimolda esa Toshloq, Yunuchqala va Oqtam qishloqlari joylashgan.

Mavjud Islom Karimov nomidagi xalqaro aeroport va yangi inshoot orasidagi masofa 15 kilometrdan oshadi.

Loyiha davlat-xususiy sheriklik (DXSH) asosida amalga oshirilmoqda. Konsorsium tarkibiga quyidagilar kiradi:

Vision Invest (Saudiya Arabistoni) — 45%;
Sojitz Corporation (Yaponiya) — 30%;
Incheon International Airport Corporation (Janubiy Koreya) — 15%;
Uzbekistan Airports (O‘zbekiston) — 10%.

Loyiha to‘rt bosqichda amalga oshiriladi. Birinchi bosqichda $2,6 mlrd investitsiya jalb etilishi kutilmoqda, shundan $1,8 mlrdi aeroport terminali qurilishiga va $800 mlni aerodrom infratuzilmasini rivojlantirishga yo‘naltiriladi.

шавкат мирзиёев, тошкент aeroporti, yangi тошкент aeroporti, жўрабек мирзамаҳмудов