O‘zbekistonda xususiy shifoxonalar soni 35% ni tashkil etdi

O‘zbekistonda xususiy shifoxonalar soni 9 mingdan oshdi. Bu haqda Sog‘liqni saqlash vazirligi ma’lum qildi.

So‘nggi sakkiz yil ichida sog‘liqni saqlashning xususiy sektori sezilarli darajada kengaydi. 2017-yilda mamlakatda taxminan 3,5 mingta xususiy shifoxona faoliyat yuritgan bo‘lsa, bugungi kunda ularning soni 9 mingdan oshdi.

Xususiy klinikalar o‘z yo‘nalishlarini 50 dan 225 tagacha kengaytirib, litsenziyalash imkoniyatlarini oshirdi. Natijada 3,7 mingdan ortiq klinika yangi tibbiy yo‘nalishlar ochib, o‘z faoliyatini kengaytirgan.

Mamlakatdagi barcha tibbiy muassasalarning 35% xususiy sektorga to‘g‘ri kelmoqda. Xususiy shifoxonalardagi statsionar o‘rinlar soni bu yil 42,7 mingga yetgan. Shuningdek, xususiy tibbiy muassasalar tomonidan ko‘rsatiladigan tibbiy xizmat turlari soni 726 dan 2,2 minggacha oshgan.

Bugungi kunda xususiy klinikalar laboratoriya xizmatlarining 40%, oftalmologiya va jarrohlik bo‘yicha oftalmologik xizmatlarning 60%, LOR-xizmatlarning 70%, va stomatologik xizmatlarning 91% ni ko‘rsatmoqda.

Kelgusida yangi xususiy tibbiy muassasalarga xalqaro standartlarni joriy etish va tibbiy xizmatlar sifatini yaxshilash rejalashtirilgan.