“Allied Biofuels” Xorazmda qariyb $6 mlrdlik ekologik aviayoqilg‘i zavodi quradi

Tuproqqal’a tumanidagi ishlab chiqarish majmuasi yiliga 500 ming tonnadan ortiq SAF va qayta tiklanuvchi dizel ishlab chiqarish quvvatiga ega bo‘ladi

“Allied Biofuels” kompaniyasi Xorazm viloyati hokimligi bilan ekologik toza aviayoqilg‘i ishlab chiqarish zavodini qurish uchun yer va suv resurslari ajratish bo‘yicha kelishuv imzoladi. Loyihaning qiymati $5,9 mlrdga baholanmoqda, deya xabar berdi kompaniya.

Zavod Tuproqqal’a tumanida joylashtiriladi. Kompaniya ma’lumotlariga ko‘ra, uning quvvatlari yiliga qariyb 382 ming tonna SAF, 152 ming tonna elektro-sintetik yoqilg‘i va 11 ming tonna qayta tiklanuvchi dizel ishlab chiqarish imkonini beradi. Korxona 2 GVt quvvatga ega elektrolizyorlar bilan jihozlanishi rejalashtirilgan.

Kelishuv Xivada o‘tkazilgan Xalqaro investitsiya forumi doirasida imzolandi. Tadbirda Xorazm viloyati hokimi Jurabek Rahimov va “Allied Biofuels FE LLC” raisi Alfred Benedikt ishtirok etdi.

Loyiha O‘zbekistonning 2030-yilga qadar nol chiqindilar maqsadiga muvofiq keladi. Ekologik toza yoqilg‘ining yirik hajmlarda ishlab chiqarilishi transport va sanoatda qazilma yoqilg‘idan foydalanishni kamaytirishi kutilmoqda.

Ekologik afzalliklar bilan bir qatorda, loyiha yuzlab ish o‘rinlarini yaratadi va O‘zbekistonning “yashil” energetika bo‘yicha mintaqaviy markaz sifatidagi mavqeini mustahkamlaydi.