Xitoydan O‘zbekistonga 22 kunlik premium temiryo‘l kruizi yo‘lga qo‘yiladi

Sayohat Markaziy Osiyoning to‘rt davlati orqali o‘tadi, narxlar $50,7 mingdan boshlanadi

Britaniyaning Golden Eagle Luxury Trains turoperatori Xitoydan O‘zbekistonga yo‘nalgan 22 kunlik hashamatli temiryo‘l kruizini ishga tushiradi. Bu haqda Travel and Tour World nashri xabar berdi.

Kruiz Xitoyning Pekin shahridan boshlanib, Qozog‘iston, Qirg‘iziston va Tojikiston orqali O‘zbekiston poytaxti Toshkentda yakunlanadi. Umumiy yo‘l masofasi 3 862 kilometrni tashkil etadi.

Sayohat dasturiga Xitoydagi Buyuk Xitoy devori va Terrakota armiyasi kabi tarixiy obidalar, shuningdek, O‘zbekistondagi YuNESKO Butunjahon merosi ro‘yxatiga kiritilgan Samarqand, Buxoro va Xiva shaharlari kiritilgan.

Yo‘lovchilar uchun Gobi cho‘lida tuya sayri, shuningdek, Olmaotaga maxsus aviareys bilan parvoz ham tashkil etiladi. Safar Golden Eagle Silk Road Express va Golden Eagle nomli maxsus poyezdlarda amalga oshiriladi. Vagonlar yog‘och bezaklar va gilamlar bilan jihozlangan.

Kruiz narxi ikki kishilik joylashuv sharti bilan bir kishi uchun $50,7 mingdan boshlanadi. Ushbu summa ovqatlanish, yashash, gidlar xizmati, transferlar va sug‘urtani o‘z ichiga oladi.

Mazkur yo‘nalish bo‘yicha ilk reys 2026-yil 21-sentabrdan 12-oktabrgacha bo‘lgan davrga rejalashtirilgan.