Wolt brendi O‘zbekistondan tashqari yana 3 ta mamlakatda faoliyatini to‘xtatadi

DoorDash kompaniyasi Deliveroo va Wolt brendlari orqali Qatar, Singapur, Yaponiya va O‘zbekistondagi faoliyatini bosqichma-bosqich yakunlashini ma’lum qildi.

Kompaniya har bir mamlakatda tartibli yopilish jarayonini boshlaydi hamda xodimlar, hamkorlar, savdo nuqtalari, mijozlar va kuryerlarni bu vaqtda qo‘llab-quvvatlashini bildirgan. Mazkur qaror bir necha oy davom etgan mamlakatlar kesimidagi tahlil natijasida qabul qilingan bo‘lib, DoorDash o‘z investitsiyalarini barqaror miqyos va uzoq muddatli yetakchilik uchun aniq imkoniyat mavjud bo‘lgan bozorlar tomon yo‘naltirishni maqsad qilgan.

Shuningdek, kompaniya ayrim hududlarda cheklangan operatsion o‘zgarishlarni amalga oshiradi, jumladan Buyuk Britaniyada muayyan muhandislik yo‘nalishlariga investitsiyalarni ko‘paytiradi. DoorDash ushbu qarorlar moliyaviy prognozlarga sezilarli ta’sir ko‘rsatmasligini ma’lum qildi — 2026-yil 18-fevralda taqdim etilgan ko‘rsatkichlar o‘zgarishsiz qoladi.

DoorDash International rahbari, Deliveroo bosh direktori va Wolt hammuassisi Miki Kuusi ushbu qaror murakkab bo‘lganini aytgan. Uning so‘zlariga ko‘ra, kompaniya e’tiborni eng samarali mahsulot taklif etish va uzoq muddatli muvaffaqiyatni ta’minlash mumkin bo‘lgan hududlarga qaratadi.

Wolt 2014-yilda tashkil etilgan Finlyandiya oziq-ovqat yetkazib berish xizmati hisoblanadi. 2022-yilga kelib esa Woltni DoorDash $8,1 mlrdga sotib olgan.

2013-yilda tashkil etilgan DoorDash bugungi kunda 40 dan ortiq mamlakatda faoliyat yuritadi. Kompaniya texnologiya va logistika yechimlari orqali mahalliy savdo ekotizimini rivojlantirish hamda biznes va iste’molchilarni bog‘lashni maqsad qilgan.