Uzum o‘z aksiyalarini London fond birjasida joylashtirishi mumkin

Raqamli ekotizim Uzum o‘z aksiyalarining birlamchi ommaviy joylashtirilishi (IPO) uchun London fond birjasi (LSE)ni mumkin bo‘lgan maydonlardan biri sifatida ko‘rib chiqmoqda. Bu haqda Reuters agentligi kompaniya hammuassisi Nikolay Seleznyovga tayanib xabar berdi.

Uning so‘zlariga ko‘ra, potentsial variantlar ro‘yxatiga Nasdaq, Abu-Dabi va Gonkong birjalari ham kiritilgan. Tencent xitoy xoldingi va VR Capital fondi tomonidan kiritilgan investitsiyalardan so‘ng, Uzumga Osiyo bozorlaridan, ayniqsa Gonkongdan katta qiziqish paydo bo‘lgan.

Aksiyalarni birlamchi joylashtirish 2027-yilga rejalashtirilgan. Biroq Seleznyovning ta’kidlashicha, hozircha kompaniyaning bozor qiymati bo‘yicha aniq maqsadni muhokama qilish erta. Agar kompaniya Londonni tanlasa, u FTSE 100 indeksiga kiritilishni o‘z oldiga maqsad qilib qo‘yadi.

Shuningdek, u so‘nggi moliyalashtirish bosqichi davomida Uzum Yaqin Sharq va Buyuk Britaniya investorlarining e’tiborini tortganini ma’lum qildi. Seleznyovning aytishicha, IPO’ni O‘zbekiston tashqarisida o‘tkazish kompaniyaga ko‘proq likvid bozorlarga chiqish va investorlar doirasini kengaytirish imkonini beradi, bu esa to‘g‘ridan-to‘g‘ri aksiyalar qiymatiga ta’sir qiladi.

U, shuningdek, Uzum xalqaro kengayish bilan shoshilmayotganini va hozircha ichki bozorda o‘z pozitsiyasini mustahkamlashga e’tibor qaratayotganini ta’kidladi. Uning so‘zlariga ko‘ra, kompaniya avvalo O‘zbekistonda o‘z biznes modeli barqarorligini isbotlab, keyin uni xorijda kengaytirishni rejalashtirgan.