To‘rt investor “UzSungwoo” ning 50% ulushini sotib olishga qiziqish bildirdi

To‘rtta investor “UzSungwoo” avtozavodining ustav kapitalidagi davlat ulushining 50% ini sotib olishga qiziqish bildirgan. Bu haqda Davlat aktivlarini boshqarish agentligi matbuot xizmati xabar berdi.

“Portfolio Investments” xususiylashtirish bo‘yicha maslahatchi sifatida oktyabr oyi oxiriga qadar to‘rtta potentsial investorning arizasini qabul qilgan. Murojaatlar belgilangan mezonlar asosida baholangan: moliyaviy holat, qonunchilikda belgilangan to‘siqlarning mavjud emasligi, jinoyat yo‘li bilan olingan daromadlarni legallashtirish va terrorizmni moliyalashtirishga qarshi talablarning bajarilishi, shuningdek, kompaniyalarning Yevropa Ittifoqi, AQSh va xalqaro moliyaviy tashkilotlar sanksiya ro‘yxatlariga kiritilmaganligi inobatga olingan.

Tahlil natijasida maslahatchi barcha to‘rtta nomzodni belgilangan talablarga to‘liq mos deb topdi va ularni xususiylashtirish jarayonining keyingi bosqichida ishtirok etishga taklif qildi. Endilikda bu kompaniyalar bilan aktivni sotib olishning asosiy shartlari va uning keyingi faoliyatini belgilovchi bitim imzolanishi rejalashtirilgan.

“UzSungwoo”dagi davlat ulushini sotib olishni istagan kompaniyalar 2025-yil 3-dekabr soat 23:59 gacha majburiy takliflarini topshirishlari kerak.

Sotib oluvchi quyidagi majburiyatlarni bajarishi lozim:

• korxonaning asosiy faoliyat turini kamida 10 yil davomida saqlab qolish;
• tasdiqlangan yetkazib beruvchi bilan texnik qo‘llab-quvvatlash bo‘yicha litsenziya shartnomalariga rioya etish;
• General Motors texnologiyalaridan foydalanish bo‘yicha asosiy ittifoq (allyans) kelishuvi talablarini bajarish.

Bundan tashqari, investor mavjud ish o‘rinlarini va xodimlar sonini kamida 2 yil davomida saqlashi, ish haqi fondini kamaytirmasligi va jamoa shartnomasida belgilangan mehnat sharoitlarini yomonlashtirmasligi lozim.

Eslatib o‘tamiz, Davlat aktivlarini boshqarish agentligi joriy yil mart oyida “UzSungwoo” kompaniyasining ustav kapitalidagi 50% davlat ulushini ochiq savdoga qo‘yish jarayonini boshlagan edi.

Aprel oyi oxiriga kelib, potentsial investorlar orasida aktivni sotib olishga qiziqish bildirganlar bo‘lmagani ma’lum bo‘ldi. Shu sababli, majburiy bo‘lmagan takliflarni (NBO) topshirish muddati uzaytirildi. Avgust oyida esa agentlik bu muddatni yana cho‘zdi — buning sababi ko‘proq investorlarni jalb etish istagi bilan izohlandi.

“UzSungwoo” — Farg‘onada joylashgan qo‘shma korxona bo‘lib, “Chevrolet Cobalt” avtomobillari uchun shtamplangan va payvandlangan qismlarni ishlab chiqarishga ixtisoslashgan.

Korxonaning ustav fondi $14 mlnni tashkil etadi. Uning asoschilari — Davlat aktivlarini boshqarish agentligi (50%), shuningdek Janubiy Koreyaning “Sungwoo Hitech” (40%) va “I-zone” (10%) kompaniyalaridir.