UzNIF IPOsidan tushgan qariyb $600 mln korxonalarni modernizatsiyaga yo‘naltiriladi

UzNIF investitsiya jamg‘armasi aktivlarining birlamchi ommaviy joylashtiruvi (IPO) orqali jalb qilingan qariyb $604 mln mablag‘ g‘azna hisobiga yo‘naltirilib, keyinchalik investitsiya loyihalarini moliyalashtirish va qarz majburiyatlarini qoplashga sarflanadi. Bu haqda Iqtisodiyot va moliya vaziri o‘rinbosari Xurshid Mustafayev tematik matbuot anjumanida ma’lum qildi.

Mustafayevning ta’kidlashicha, tushgan mablag‘larni taqsimlash hukumat bilan qat’iy kelishuv asosida amalga oshiriladi. Uning so‘zlariga ko‘ra, investitsiyalar jamg‘arma tarkibidagi korxonalarni qo‘llab-quvvatlashga yo‘naltiriladi. Chunki ularga investitsiya loyihalarini amalga oshirish, kreditlarni qaytarish, shuningdek ishlab chiqarish quvvatlarini modernizatsiya qilish va kengaytirish uchun katta mablag‘ zarur.

Hududlarda keng ko‘lamli marketing kampaniyasi o‘tkazilmagani haqidagi savolga javoban boshqa spiker reklama ishlari arizalar yig‘ish davridagi qat’iy tartiblar sabab ikki haftalik muddat bilan cheklanganini aytdi. Shunga qaramay, ichki talabni rag‘batlantirish maqsadida fuqarolarga aksiyalarning boshlang‘ich narxidan 5% lik chegirma taqdim etilgan. Targ‘ibot ishlari mahalliy brokerlar bilan hamkorlikda olib borilgan va 500 mingdan ortiq foydalanuvchiga push-xabarnomalar yuborilgan.

Yakunda vazirlik vakillari aholi tomonidan yuqori qiziqish kuzatilganini qayd etdi. Savdolarda qariyb 5 ming nafar jismoniy shaxs ishtirok etgan. Spikerlar ma’lumotiga ko‘ra, chakana investorlar tomonidan kiritilgan investitsiyalar hajmi $17,7 mlnni tashkil etgan. Bu ko‘rsatkich O‘zbekistondagi avvalgi barcha shunga o‘xshash joylashtirishlar yig‘indisidan ham yuqori.

Muhokama davomida institutsional investorlarni jalb qilish masalasi ham ko‘tarildi. Hozirgi bitimda 150 dan ortiq institutsional investor qatnashgan. Jamg‘arma vakillarining tushuntirishicha, ikki tomonlama listing yirik investorlarni avval xalqaro maydonlar orqali jalb qilib, keyinchalik ularni Toshkent fond birjasiga olib kelish uchun xizmat qiladi. Mahalliy bozordagi faollikni oshirish uchun esa yangi kapital bozori qonunchiligi joriy etilishi va kelajakda pensiya jamg‘armasining ham savdolarda ishtiroki kutilmoqda.