“UzAuto Motors” bosh direktori ish haqining 5% miqdorida jarimaga tortildi

“UzAuto Motors Powertrain” bosh direktori Bu Inge Andersson ish haqining 5% miqdorida jarima oldi. Bu haqda korporativ ma’lumotlarning yagona portalida xabar berilgan. 

Jarimaning sababi shundaki, u tashqi savdo operatsiyalari bo’yicha debitorlik qarzlarini o’z vaqtida hal qilish uchun zarur choralarni ko’rmagan. 

Andersson 2021-yil avgust oyidan beri “UzAuto Motors Powertrain” va “UzAuto Motors” kompaniyalarini boshqarib kelmoqda. Ilgari, 2013 yildan 2016 yilgacha u “AvtoVAZ” rahbari bo’lgan. “UzAuto Motors” kompaniyasiga o’tishdan oldin shved mutaxassisi Yaponiyaning “Yazaki” avtomobil komponentlari kompaniyasining Yevropa bo’linmasini boshqargan.

Eslatib o’tamiz, O’zbekiston raqobatni rivojlantirish va iste’molchilar huquqlarini himoya qilish qo’mitasi “UzAvto Motors” kompaniyasiga nisbatan ish qo’zg’atgan edi.