UzAuto Motors aksiyadorlarga har bir aksiya uchun 975 so‘mdan dividend to‘laydi

UzAuto Motors aksiyadorlariga har bir aksiya uchun 975 so‘mdan dividend ajratiladi. Bu haqida ma’lumot Yagona korporativ ma’lumotlar portalida e’lon qilindi.

2025-yil 10-yanvar kuni bo‘lib o‘tgan aksiyadorlar yig‘ilishida kompaniyaning 2024-yilning dastlabki 9 oyi uchun foydasidan 264 mlrd so‘m dividend to‘lashga ajratish qarori qabul qilindi.

Bu har bir aksiya uchun 975 so‘mni yoki uning bozor qiymatining 1,3% ini tashkil qiladi. Kompaniyaning qolgan 8,6 trln so‘m sof foydasi esa kompaniya tasarrufida qoldi. Dividendlar 2025-yil 10-yanvardan 11-martgacha to‘lanadi. Dividend olish uchun aksiyadorlar reestri 2025-yil 3-yanvarda yopilgan.

Eslatib o‘tamiz, Saidazim G‘ulomov UzAuto Motors Powertrain rahbari lavozimiga yangi nomzod tayinlangunga qadar vaqtinchalik boshqaruvchi etib tayinlandi. Yangi rahbar 2025-yil 30-iyungacha tayinlanishi rejalashtirilgan.

Avvalroq, 2024-yil 27-dekabr kuni UzAuto Motors va UzAuto Motors Powertrain rahbari bo‘lgan Bu Anderson o‘z lavozimidan ketgan edi.