Toshkent viloyati IIBB “Uch qahramon” bozoridagi yong‘in yuzasidan ish qo‘zg‘atdi

Toshkent viloyati IIB Tergov boshqarmasi “Uch qahramon” bozorida yuz bergan yong‘in bo‘yicha jinoyat ishi qo‘zg‘atdi. Bu haqda idora matbuot xizmati ma’lum qildi.

Ish O‘zbekiston Jinoyat kodeksining 259-moddasi 2-qismi “b” bandi – og‘ir oqibatlarga olib kelgan yong‘in xavfsizligi qoidalarini buzish bo‘yicha ochilgan. Ushbu modda bo‘yicha jazo ikki yildan besh yilgacha ozodlikni cheklash yoki ayrim huquqlardan mahrum etgan holda xuddi shu muddatga ozodlikdan mahrum qilishni nazarda tutadi.

“Uch qahramon ixtisoslashgan savdo majmuasi” savdo binolarining umumiy maydoni 20 ming kvadrat metrni tashkil etadi.

Xabarda ta’kidlanishicha, yong‘inni o‘chirish jarayonida bozorning 60% ini tashkil etuvchi 12 ming kvadrat metr savdo maydoniga olov tarqalishining oldi olingan. Qurbonlar va jabrlanganlar yo‘q. Demak, hududning taxminan 40%i zarar ko‘rgan.

Yong‘in 11-avgustga o‘tar kechasi boshlanib, uni bartaraf etish ikki soatdan ortiq vaqt olgan. O‘chirish ishlarida 10 ta yong‘in o‘chirish guruhi ishtirok etgan.