“Uch Qahramon” bozoridagi yong‘in oqibatida yetkazilgan zarar 74 mlrd so‘mga baholandi

Kapital.uz 11-avgust kuni Uch qahramon ixtisoslashgan savdo majmuasi” hududida yirik yong‘in sodir bo‘lgani haqida xabar bergan edi.

Dastlabki ma’lumotlarga ko‘ra, yong‘in taxminan 8 ming kvadrat metr maydonni qamrab olgan va savdo pavilonlaridagi barcha mol-mulkni yo‘q qilgan. Jamiyat va fuqarolarga yetkazilgan umumiy moddiy zarar 74 mlrd so‘m deb baholandi

Yong‘in sababi

Tergov faraziga ko‘ra, yong‘inga bozor kirishidagi ikkita do‘kon orasidagi elektr simlaridagi haddan tashqari yuklanish va yuqori qarshilik tufayli yuzaga kelgan nosozlik sabab bo‘lgan bo‘lishi mumkin. Dastlabki yong‘in-qutqaruv guruhlari chaqiruvdan 9 daqiqa o‘tgach voqea joyiga yetib kelgan va soat 04:46 da yong‘in butunlay bartaraf etilgan.

Jinoiy ish

Hodisa yuzasidan Jinoyat kodeksining 259-moddasi 2-qismi “b” bandi bo‘yicha jinoiy ish qo‘zg‘atildi. Tergov harakatlari Toshkent viloyati IIBga qarashli Tergov boshqarmasi tomonidan olib borilmoqda. Yong‘inning aniq sabablarini aniqlash maqsadida soha mutaxassislari ishtirokida kompleks sud ekspertizasi tayinlandi.

Yong‘in oqibatida A blokida 78 nafar tadbirkor (106 ta do‘kon), S blokida 11 nafar tadbirkor (19 ta do‘kon), E blokida 48 nafar tadbirkor (56 ta do‘kon) zarar ko‘rdi. Jami 137 nafar tadbirkor (181 ta do‘kon va 76 ta bo‘sh xona) zarar ko‘rgan.

Amalga oshirilgan ishlar

Joriy yilning 12-13 avgust kunlari tuman hokimi va Jamiyat ma’muriyati rahbarligida jabrlangan 165 nafar tadbirkorni qo‘llab-quvvatlash va ularning faoliyatini davom ettirish maqsadida bozor hududida 63 ta bo‘sh turgan savdo do‘koni ajratilib, joylashtirildi. 125 ta tadbirkor ularni bir oy muddatga ijara to‘lovisiz oldi.

Xususan:

• 12 m² maydonli 56 ta do‘konga ikki kishidan — jami 112 nafar tadbirkor;
• 24 m² maydonli 2 ta do‘konga to‘rt kishidan — jami 8 nafar tadbirkor;
• 9 m² maydonli 5 ta do‘konga bir kishidan — jami 5 nafar tadbirkor joylashtirildi.

Sakkiz nafar tadbirkor rad etib, faoliyatini to‘xtatganini ma’lum qildi. Yana to‘rt kishi do‘kon olishni istagan, ammo ariza topshirmagan.Ertadan boshlab yong‘indan zarar ko‘rgan tadbirkorlar bozorning yong‘in bo‘lmagan qismidagi bo‘sh do‘konlarga ko‘chib o‘tishni boshlaydilar. Ushbu bozor 17 avgustdan faoliyatini qayta tiklaydi. Qayta ochilish kunida men yana kelib, har bir tadbirkor bilan shaxsan suhbatlashaman. Tadbirkorlar orasidan vakillari tanlanadi, ular ma’muriyat bilan birgalikda savdo joylarining adolatli taqsimlanishini nazorat qiladi, — dedi Toshkent viloyati hokimi Zoyir Mirzayev.

Viloyat prokurori Azamat Mirzayev barcha holatlarni aniqlash va vaziyatga huquqiy baho berish uchun 40 nafar tergovchidan iborat guruh jalb qilinganini ma’lum qildi. Bozor hududida sayyor shtab shaklida tezkor tergov harakatlari olib borilmoqda.

Viloyat IIB boshlig‘i Abduvosit Abdurazzoqov IIB tergov boshqarmasi boshqa huquqni muhofaza qiluvchi organlar bilan hamkorlikda dastlabki tergov harakatlarini olib borayotganini, yetkazilgan zarar miqdorini aniqlash uchun tegishli mutaxassislar jalb etilganini ta’kidladi.

Hududda yong‘inning kelib chiqish sabablari va oqibatlarini batafsil o‘rganish hamda ularni bartaraf etish ishlari davom etmoqda. 17 avgustdan bozorning yong‘indan zarar ko‘rmagan qismida savdoni tiklashga ruxsat beriladi, — deya ma’lum qildi viloyat FVB boshlig‘i Abdulaziz Alimatov.