O‘zbekiston va Turkmaniston o‘zaro tovar aylanmasini $2 mlrdga yetkaziladi

O‘zbekiston va Turkmaniston o‘zaro tovar ayirboshlash hajmini hozirgi $1 mlrddan $2 mlrdga oshirishni rejalashtirmoqda. Bu haqda O‘zbekiston Prezidenti matbuot xizmati xabar berdi.

Muzokaralar va iqtisodiy maqsadlar

Tomonlar ikki tomonlama munosabatlarni yanada kengaytirish masalalarini ko‘rib chiqdi. So‘nggi yillarda savdo hajmi ikki baravar oshib, $1 mlrddan oshgani qayd etildi. Yetkazib beriladigan mahsulotlar turini kengaytirish va erkin savdo rejimidan foydalanish orqali bu ko‘rsatkichni $2 mlrdga yetkazish imkoniyati mavjudligi ta’kidlandi.

Sanoat kooperatsiyasini kengaytirish uchun qurilish materiallari, farmatsevtika mahsulotlari va oziq-ovqat ishlab chiqarish bo‘yicha yangi loyihalarga biznesni faol jalb etish zarurligi qayd etildi. Energetika sohasida konlarni birgalikda o‘zlashtirish kabi yirik loyihalarga o‘tish bo‘yicha kelishuvga erishildi.

Transport sohasida tomonlar Turkmanbashi portini birgalikda rivojlantirish va poytaxtlar o‘rtasidagi to‘g‘ridan-to‘g‘ri aviaqatnovlarni tiklashga kelishib oldi.

Chegaraoldi savdo zonasining ishga tushirilishi

Muzokaralar chog‘ida Shavkat Mirziyoyev va Serdar Berdimuhamedov “Shavat–Dashog‘uz” qo‘shma chegaraoldi savdo zonasining ochilish marosimida ishtirok etdi. Bu tajribani boshqa hududlarda, xususan “Olot–Farap” yo‘nalishida ham qo‘llash bo‘yicha kelishuvga erishildi.

Yangi hududda direksiya, bojxona, karantin, fitosanitariya va veterinariya xizmatlarining ma’muriy binolari, shuningdek savdo pavilyoni va omborxonalari joylashgan. Zonada “yagona darcha” tamoyili asosida davlat xizmatlari, bank, tibbiyot va mehmonxona xizmatlari ko‘rsatiladi. Ushbu zona faoliyati Xorazm viloyati va Dashog‘uz viloyati o‘rtasidagi aloqalarni, aholisi jami 3,5 mlndan ortiq bo‘lgan hududlar o‘rtasidagi hamkorlikni yanada chuqurlashtirishga xizmat qilishi kutilmoqda.

O‘zbekiston va Turkmaniston sammiti yakunida ikki tomonlama kelishuvlarning salmoqli to‘plami qabul qilindi.

Ma’lum qilinishicha, prezident Shavkat Mirziyoyev va Turkmaniston rahbari Serdar Berdimuhamedov qo‘shma bayonot imzoladi.

Davlat rahbarlari huzurida quyidagi ikki tomonlama hujjatlarni almashish marosimi bo‘lib o‘tdi:

• O‘zbekiston—Turkmaniston chegaraoldi savdo zonasi faoliyati to‘g‘risidagi shartnoma;
• Sog‘liqni saqlash va tibbiyot fani sohasidagi hamkorlik to‘g‘risidagi bitim;
• Qishloq xo‘jaligi sohasidagi hamkorlikni yanada rivojlantirish to‘g‘risidagi bitim;
• Favqulodda vaziyatlarning oldini olish va oqibatlarini bartaraf etish sohasida hamkorlik to‘g‘risidagi hukumatlararo bitimga o‘zgartirishlar kiritish to‘g‘risidagi bayonnoma;
• Xalqaro avtomobilda yo‘lovchi va yuk tashish to‘g‘risidagi hukumatlararo bitimga o‘zgartirishlar kiritish to‘g‘risidagi bayonnoma;
• Adliya vazirliklari o‘rtasida 2026-2027-yillarga mo‘ljallangan hamkorlik dasturi;
• Madaniyat sohasida 2026-2027-yillarga mo‘ljallangan hamkorlik dasturi;
• Neft mahsulotlari va suyuq kimyoviy yuklarni tashish uchun temir yo‘l vagonlarini yetkazib berish sohasidagi hamkorlik to‘g‘risidagi memorandum;
• Biologik xavfsizlikni ta’minlash masalalari bo‘yicha o‘zaro anglashuv memorandumi;
• O‘zbekiston Respublikasi prezidenti huzuridagi Strategik va mintaqalararo tadqiqotlar instituti hamda Turkmaniston Tashqi ishlar vazirligining Xalqaro munosabatlar instituti o‘rtasida O‘zbekiston—Turkmaniston ekspertlar kengashini tuzish to‘g‘risidagi memorandum;
• O‘zbekiston Respublikasi prezidenti huzuridagi Qonunchilik va huquqiy siyosat instituti hamda Turkmaniston Davlat, huquq va demokratiya instituti o‘rtasidagi hamkorlik to‘g‘risidagi memorandum;
• O‘rmon xo‘jaligi sohasida 2026-2030-yillarga mo‘ljallangan hamkorlik bo‘yicha “yo‘l xaritasi”.

Shuningdek, Surxondaryo va Qashqadaryo viloyatlari hokimliklari bilan Lebap viloyati hokimligi, Toshkent viloyati hokimligi bilan Axal viloyati hokimligi hamda Qoraqalpog‘iston Respublikasi Vazirlar Kengashi bilan Toshhovuz viloyati hokimligi o‘rtasida savdo-iqtisodiy, ilmiy-texnikaviy va madaniy-gumanitar sohalardagi hamkorlik to‘g‘risidagi bitimlar imzolandi.

Kapital.uz avvalroq O‘zbekiston va Qozog‘iston o‘rtasida o‘zaro hamkorlikka oid 13 ta hujjat imzolangani haqida xabar bergandi.