Farg‘onada “Tulpor” traktorlari ishlab chiqaradigan zavod qurilishi boshlandi

Farg‘onada “Qo‘qon” EIZ filiali hududida “Tulpor” brendi ostida qishloq xo‘jaligi texnikasini ishlab chiqaruvchi korxona qurilishi boshlandi.

Loyihani Ferghana Tulpor Machinery kompaniyasi amalga oshirmoqda.

Poydevor qo‘yish marosimida Farg‘ona viloyati hokimi Xayrullo Bozorov, prokuratura, IIV, shahar hokimligi vakillari, shuningdek, xitoylik tadbirkorlar va investorlar ishtirok etdilar.

Zavod 7 gektar maydonni egallaydi. Dastlabki bosqichda investitsiyalar hajmi $30 mlnni tashkil etib, uch yil ichida $300 mlngacha yetkaziladi. Kelajakda asosiy ishlab chiqarish yonida ehtiyot qismlar tayyorlovchi korxonalar ham barpo etiladi.

Zavodda bog‘larda ishlaydigan kichik modellardan tortib, 400 ot kuchiga ega bo‘lgan qudratli mashinalargacha turli quvvatdagi traktorlar ishlab chiqarish mo‘ljallanmoqda. Mahsulotlar ham ichki bozorga, ham Markaziy Osiyo va MDH mamlakatlariga eksport qilinadi.

Loyiha natijasida 250 ta yangi ish o‘rni yaratilishi kutilmoqda. Marosim doirasida ishlab chiqarilishi rejalashtirilgan texnikalarning dastlabki namunalari namoyish etildi.