Yil oxirigacha Toshkentda birinchi “JW Marriott” mehmonxonasi ochiladi

Amerikaning yirik mehmonxona tarmog‘i “Marriott International” va O‘zbekistondagi “Alliance Holding” kompaniyasi o‘rtasida O‘zbekistonda birinchi “JW Marriott” brendi ostidagi mehmonxonani ochish bo‘yicha kelishuv imzolandi.

Yangi mehmonxona 2025-yil oxirida foydalanishga topshirilishi rejalashtirilgan bo‘lib, u Tashkent City Mall hududida joylashadi. Ushbu kompleksda mamlakatdagi eng yirik savdo-ko‘ngilochar markaz ham bo‘ladi.

“JW Marriott Hotel Tashkent” mehmonxonasi 287 ta zamonaviy xona va lyukslarni, restoranlar, SPA va wellness markazi, biznes zali, JW Garden zonasi hamda keng konferensiya zallarini o‘z ichiga oladi. Mehmonxona interyeri tabiatdan ilhomlangan bo‘lib, mehmonlarga qulaylik va osoyishta muhitni taqdim etishga yo‘naltiriladi.

“JW Marriott” — “Marriott International” kompaniyasining yuqori toifadagi brendlaridan biri bo‘lib, dunyoning 40 dan ortiq mamlakatlarida 125 dan ortiq mehmonxonani birlashtiradi.

Hozirda O‘zbekistonda Marriott tomonidan boshqarilayotgan yagona mehmonxona bu — “Courtyard by Marriott Tashkent” hisoblanadi. “JW Marriott” mehmonxonasining ishga tushirilishi kompaniyaning O‘zbekistondagi pozitsiyasini yanada mustahkamlashi kutilmoqda.