Oʻzbekiston oltin eksporti toʻqqiz oyda rekord darajadagi $9,9 mlrdga yetdi

Respublikadan yanvar-sentyabr oylarida qimmatbaho metal yetkazib berish hajmi $9,89 mlrdga yetib, tarixiy maksimum yangilandi. Bu haqda Statistika qoʻmitasi xabar bermoqda.

2025-yil yanvar-sentyabr yakunlariga koʻra, oltin sotishdan tushgan tushum $9,89 mlrdni tashkil etdi, bu yillik hisobda 70,9% oʻsishni koʻrsatadi. Oʻtgan yili bu koʻrsatkich $5,7 mlrdga yetgan edi.

Respublika umumiy eksporti tarkibida nomonetar oltinning (oltin rudalari va konsentratlaridan tashqari) ulushi 2025-yil yanvar-sentabr oylarida 37,1% ni tashkil etdi.

Shu bilan birga, Oʻzbekiston ayni shu davrda qimmatbaho metalni import ham qilgan. Xaridlar hajmi $229,7 mlnni tashkil etdi.

Jahon oltin kengashi maʼlumotlariga koʻra, yil boshidan buyon mamlakatning oltin zaxirasi 17 tonnaga qisqargan. Shunga qaramay, Oʻzbekiston dunyodagi eng yirik oltin sotuvchisi maqomini saqlab qolmoqda.

Mamlakatning oltin-valyuta zaxiralari sentyabr oyida ham yangi tarixiy rekordga yetdi. Ularning hajmi $54,99 mlrdgacha oʻsib, bir oy ichida $4,9 mlrdga koʻpaydi. Markaziy bank omborlaridagi monetar oltin qiymati birinchi marta $44,2 mlrdga yetdi (+$4,17 mlrd oʻsish). Bu metalning jismoniy hajmi biroz kamaygan (11,8 mlndan 11,6 mln troya unsiyasiga) boʻlishiga qaramay, uning qimmatlashishi fonida sodir boʻldi.

Toʻqqiz oy ichida Navoiy kon-metallurgiya kombinati (NKMK) 95,3 trln soʻmlik mahsulot ishlab chiqardi, bu oʻtgan yilning shu davriga nisbatan 42,7% ga koʻpdir. Oltin ishlab chiqarish hajmi 2,34 mln troya unsiyasiga yetdi (yillik oʻsish 2%).

Davlat kompaniyasi birinchi yarim yillikda ham rekord natijalar haqida hisobot bergan. NGMK daromadi $4,7 mlrdga yetgan (40,9% oʻsish), sof foyda esa yillik taqqoslashda 71,8% ga oshib, $1,51 mlrdni tashkil etdi.