Toqaev AQShning 25% boj qaroriga javoban Trampga maktub yo‘lladi

Qozog‘iston Prezidenti AQShning Qozog‘iston tovarlariga 25% lik boj joriy etish qaroriga javoban Donald Trampga maktub yo‘lladi.

Murojaatnomasida To‘qayev Qozog‘iston AQShning ishonchli savdo va investitsiya sherigi bo‘lib qolayotganini hamda adolatli, bashorat qilinadigan va o‘zaro manfaatli savdo aloqalari tarafdori ekanligini ta’kidladi.

Davlat rahbari o‘zaro maqbul yechim topish uchun konstruktiv muloqotni davom ettirishga tayyorligini tasdiqladi va kelishuvga erishish mumkinligiga ishonch bildirdi.

Ilgari AQSH prezidenti 2025-yil 1-avgustdan yangi tariflar joriy etilishini e’lon qilgan edi. U bunga sabab qilib muvozanatsiz savdo siyosatini va uning aytishicha, savdo balansida doimiy taqchillikka olib kelgan to‘siqlar mavjudligini ko‘rsatgan edi.

Uning ta’kidlashicha, bevosita Amerika hududida ishlab chiqarilgan mahsulotlardan tashqari, AQShga keladigan barcha Qozog‘iston tovarlaridan 25% lik boj olinadi.