O‘zbekistonda to‘lovlar uchun universal QR-kod joriy etiladi

Mamlakatda matritsali shtrix-kodlar orqali to‘lovlarni amalga oshirish uchun yagona standartlar joriy qilinadi. Bu haqda Lex.uz portalida e’lon qilingan prezident qarorida aytilgan.

2025–2026-yillarga mo‘ljallangan tasdiqlangan dasturga ko‘ra, regulyator tranzaksiyalar jarayonini unifikatsiya qilmoqchi. Markaziy bank raisi Timur Ishmetovga joriy yil dekabr oyida kredit tashkilotlari va to‘lov tashkilotlari bilan hamkorlikda universal kod bo‘yicha sinov loyihasini ishga tushirish topshirildi.

Zarur normativ-huquqiy baza ishlab chiqilishi va tasdiqlanishi 2026-yil yanvariga rejalashtirilgan. Yagona standartni to‘lov xizmatlari bozoriga to‘liq joriy etish esa fevral oyida kutilmoqda.

Texnologiyadan foydalanish biznesga POS-terminallar xaridini kamaytirish imkonini beradi, xaridorlarga esa avtomatik tarzda soliq keshbekini olishni ta’minlaydi.

Eslatib o‘tamiz, avgust oyidagi qarorga ko‘ra, o‘zini o‘zi band qilganlar va yakka tartibdagi tadbirkorlar naqd pulsiz to‘lovlarni qabul qilish uchun QR-kodga ega bo‘lishi shart. Uning yo‘qligi kassa apparatini qo‘llamaslik bilan tenglashtiriladi.

Bundan avval Kapital.uz O‘zbekistonda steyblkoinlardan to‘lov vositasi sifatida foydalanishga ruxsat berilishi haqida xabar bergan edi.