“TBC Uzbekistan” o‘zining protsessing markazini ishga tushirdi

“TBC Uzbekistan” o‘zining yuqori texnologiyali protsessing markazini ishga tushirganini e’lon qildi. Ushbu markaz to‘lovlarni samarali qayta ishlash va yangi mahsulotlarni tezkor ravishda bozorda joriy etishni ta’minlaydi.

Protsessing markazi bankning barcha to‘lov operatsiyalarini, jumladan P2P o‘tkazmalari, kartalar orqali to‘lovlar va QR-kod yordamida to‘lovlarni qayta ishlashning asosiga aylanadi.

«Bu bizga bozor o‘zgarishlariga tez moslashish, shuningdek, “Apple Pay”, “Google Pay” va “PayPal” kabi ommabop xizmatlarni O‘zbekistonda joriy etilgan zahoti ishga tushirish imkonini beradi», — dedi bank bosh direktori.

Kutilishicha, yangi markaz nafaqat “TBC Uzbekistan” ekotizimini rivojlantirishni tezlashtiradi, balki mamlakatdagi butun to‘lov infratuzilmasini modernizatsiya qilishda muhim qadam bo‘ladi.

Bankning moliyaviy ko‘rsatkichlari ijobiy dinamikani tasdiqlaydi: 2024 yilning birinchi yarmida sof foyda $16 mlnni tashkil etdi, kredit va depozit portfeli esa yillik nisbatda mos ravishda 113% va 58%ga oshdi.