Rossiyaning “Tatlift” kompaniyasi Buxoro viloyatida $5,5 mlnlik lift ishlab chiqarishni yo‘lga qo‘ymoqda

Rossiyaning “Tatlift” kompaniyasi “Buxoro sanoat-rivojlanish majmuasi” maxsus industrial parki hududida $5,5 mlnlik lift ishlab chiqarishni yo‘lga qo‘ymoqda. Bu haqda Buxoro viloyati hokimligi matbuot xizmati ma’lum qildi.

Korxona yiliga 2 ming dona lift ishlab chiqarish quvvatiga ega bo‘ladi. Ushbu tashabbus yangi texnologiyalarni joriy etish, viloyat sanoatini diversifikatsiya qilish va 150 ta ish o‘rni yaratish imkonini berishi kutilmoqda.

O‘zaro tashriflar doirasida Gulshat Zagudulina rahbarligidagi Tatariston delegatsiyasi Buxoroga tashrif buyurdi. Viloyat hokimi Botir Zaripov bilan uchrashuvda tomonlar loyihaning borishi va uning istiqbollarini muhokama qilishdi.

Muzokaralar yakunida Buxoro viloyati hokimligi bilan “Tatlift” kompaniyasi o‘rtasida o‘zaro anglashuv memorandumi imzolandi. Shuningdek, loyihani amalga oshirishda ishtirok etayotgan hamkor kompaniyalar bilan alohida bitimlar tuzildi.

Eslatib o‘tamiz, joriy yilning mart oyi oxirida “Tatlift” Qashqadaryo viloyati hokimiyati bilan mahalliy maxsus iqtisodiy zonada lift ishlab chiqarishni yo‘lga qo‘yish bo‘yicha xuddi shunday memorandum imzolagan edi. Biroq, ushbu loyihaning amalga oshirilishi bo‘yicha boshqa ma’lumotlar hozircha kelib tushmadi.