Toshkentda noqonuniy buzilgan reklama konstruksiyalari uchun kompensatsiya beriladi

Toshkent shahrida tashqi reklama konstruksiyalari noqonuniy demontaj qilingan tadbirkorlarga kompensatsiya to‘lanadi. Bu haqda poytaxt hokimligida o‘tkazilgan matbuot anjumanida ma’lum qilindi, deb xabar bermoqda Kapital.uz jurnalisti.

Ma’lum qilinishicha, yagona dizayn-kod joriy etilishi doirasida shahar ko‘rinishini tartibga solish, reklama obyektlari, yoritish tizimi va yo‘l infratuzilmasini yagona standart asosida shakllantirish rejalashtirilgan. Tadbirda bosh arxitektor Yegor Ikramov, transport masalalari bo‘yicha hokim o‘rinbosari Abdurahmon Baxtiyev va boshqa mutasaddilar ishtirok etdi.

Loyiha asosiy maqsadi — shahar ko‘chalaridagi vizual tartibsizlikni kamaytirish va estetik muhit yaratishdan iborat. Dizayn-kod xalqaro tajribaga asoslangan holda, mahalliy iqlim va tarixiy xususiyatlar inobatga olinib ishlab chiqilgan.

Shu bilan birga, yangi tartiblar joriy etilishi jarayonida ayrim tadbirkorlar reklama konstruksiyalari ruxsatsiz buzilgani yuzasidan norozilik bildirgan. Ularning aytishicha, ayrim hollarda tegishli ruxsatnomalar mavjud bo‘lishiga qaramay, obyektlar ogohlantirishsiz olib tashlangan.

Hokimlik vakillari bunday holatlarda xatolar bo‘lishi mumkinligini tan olib, zarar ko‘rgan tadbirkorlarga tuman hokimliklariga murojaat qilishni tavsiya etdi. Ularning so‘zlariga ko‘ra, asosli murojaatlar bo‘yicha yetkazilgan zarar qoplanadi.

Ta’kidlanishicha, dizayn-kod qat’iy shablon emas, balki umumiy qoidalar majmui hisoblanadi. Biroq u tarixiy obyektlardan tashqari barcha binolar uchun majburiy bo‘ladi. Nazorat esa hokimliklar va Kadastr agentligi tomonidan amalga oshiriladi.

Shuningdek, uchrashuvda transport infratuzilmasini rivojlantirish masalalari ham ko‘rib chiqildi. Xususan, yopiq va konditsionerli “aqlli” bekatlar o‘rniga ochiq turdagi, elektron tablo bilan jihozlangan zamonaviy bekatlar qurish rejalashtirilmoqda.