1-dekabrdan tadbirkorlar uchun yangi kafillik va imtiyozlar joriy etiladi

2025-yil 1-dekabrdan boshlab tadbirkorlar uchun qo‘shimcha kafolat va kafilliklar taqdim etilishi belgilandi.

Yirik tadbirkorlarga 10 mlrd so‘mgacha, lekin kredit, lizing, bank kafolati va akkreditivlarning 50% idan oshmagan miqdorda kafillik beriladi. O‘rta va yirik biznesning ishlab chiqarish, xizmat ko‘rsatish hamda “yashil” iqtisodiyot yo‘nalishidagi loyihalariga esa ularning aylanmasidan kelib chiqib, 10 mlrd so‘mdan ortiq miqdorda kafillik berilishi ko‘zda tutilgan. Shuningdek, oldin kafillikdan samarali foydalangan va ijobiy kredit tarixiga ega tadbirkorlar uchun amaldagi miqdor 1,5 baravargacha oshiriladi.

2026-yil 1-yanvardan olis va borish qiyin hududlarda ro‘yxatdan o‘tgan kichik va o‘rta tadbirkorlarning kreditlari mos ravishda 1,5 mlrd va 5 mlrd so‘mgacha bo‘lgan qismini Markaziy bank stavkasidan 4 punkt yuqori stavkagacha qayta moliyalashtirish orqali kompensatsiya qilinadi.

Bundan tashqari, kamabag‘al oilalar reyestriga kiritilgan oilalar a’zolari tadbirkorlik subyektlarida band qilingan hollarda, kamida 5 nafar xodim ishga jalb etilganda – 2% gacha, 10 nafar bo‘lsa – 4% gacha, 20 nafar bo‘lsa – 6% gacha qayta moliyalashtirish imtiyozlari qo‘llaniladi.

Kapital.uz avvalroq ayni shu qaror bilan kelgusi ikki yilda 4 trln so‘mlik 5 mingta tadbirkorlik loyihalari moliyalashtirilishi haqida xabar bergandi.