O‘zbekistonda tabiiy gaz qazib olish 15% ga kamaydi

2026-yilning yetti oyida elektr energiyasi ishlab chiqarish 6,4% ga oshgan bo‘lsa, tabiiy gaz qazib olish 15% ga kamaydi. Bu haqda Milliy statistika qo‘mitasi hisobotida ma’lum qilindi.

2026-yil yanvar–iyul oylarida O‘zbekistonda uglevodorodlarning asosiy turlarini qazib olish hajmi kamaygan. Tabiiy gaz qazib chiqarish 21,6 mlrd kub metrni tashkil etib, o‘tgan yilning mos davriga nisbatan 15% ga qisqargan.

Yetti oyda neft qazib olish 368,7 ming tonnaga yetdi. Bu yillik hisobda 2,7% ga kam. Gaz kondensati qazib olishda esa yanada sezilarli pasayish qayd etildi — uning hajmi 567,5 ming tonnani tashkil qilib, o‘tgan yilning mos davridagi ko‘rsatkichdan 15% ga kamaydi.

Ko‘rsatkichlarni 2024-yil bilan taqqoslaganda pasayish yanada yuqori bo‘lgan. Tabiiy gaz qazib olish 17,9% ga, neft 13,2% ga, gaz kondensati esa 21,8% ga kamaygan.

Shu bilan birga, ayrim turdagi yoqilg‘ilar ishlab chiqarish hajmi oshgan. Yanvar–iyul oylarida korxonalar 731,9 ming tonna benzin ishlab chiqardi. Bu 2025-yilning mos davriga nisbatan 8,9% ga ko‘p. Biroq 2024-yilning shu davriga nisbatan benzin ishlab chiqarish hajmi 7,5% ga pastligicha qolmoqda.

Dizel yoqilg‘isi ishlab chiqarish 683,4 ming tonnani tashkil etdi. Bu 2025-yilning yetti oyidagi ko‘rsatkichdan 1,4% ga va 2024-yilning mos davridagi hajmdan 9,4% ga yuqori.

Ko‘mir sanoatida ham pasayish qayd etildi. Yetti oyda 3,5 mln tonna ko‘mir qazib olindi, bu o‘tgan yilning mos davriga nisbatan 12,5% ga kam. Shu bilan birga, 2024-yil yanvar–iyul oylariga nisbatan qazib olish hajmi deyarli o‘zgarmagan.

Portlandsement ishlab chiqarish esa o‘sishda davom etdi. Yanvar–iyul oylarida uning ishlab chiqarish hajmi 12,1 mln tonnaga yetib, o‘tgan yilning mos davriga nisbatan 0,8% ga, 2024-yilning shu davriga nisbatan esa 33% ga oshdi.

Energetika sohasida ko‘rsatkichlar turlicha bo‘ldi. Elektr energiyasi ishlab chiqarish 6,4% ga oshib, 52,5 mlrd kVt·soatni tashkil etdi. Asosiy o‘sish kichik tadbirkorlik subyektlari hissasiga to‘g‘ri keldi — ular elektr energiyasi ishlab chiqarishni 35,1% ga oshirib, 17,25 mlrd kVt·soatga yetkazdi.

Yirik korxonalar esa shu davrda elektr energiyasi ishlab chiqarishni 3,6% ga kamaytirib, 35,25 mlrd kVt·soatgacha tushirdi. Ular tomonidan issiqlik energiyasi ishlab chiqarish ham qisqardi. Ko‘rsatkich 10,12 mln Gkalni tashkil etib, o‘tgan yilga nisbatan 18,3% ga kamaydi.