Tabiiy gaz uchun bazaviy me’yor aprelgacha uzaytirildi

Tabiiy gaz uchun isitish mavsumida belgilangan 500 kubometrlik bazaviy me’yor 1-aprelga qadar uzaytirildi. Bu haqda Energetika vazirligi xabar berdi.

Qonunchilikka ko‘ra, 1-martdan boshlab isitish mavsumida tabiiy gaz uchun joriy qilingan 500 kubometrlik bazaviy me’yor 100 kubometrga tushirilishi belgilangan edi.

“Biroq, mart oyida havo haroratining pasayishi, ayrim kunlari tunda va kunduzi 0°C darajadan tushishi va odatdagidan sovuqroq bo‘lishi kutilmoqda. Aholi uchun qulaylik yaratish maqsadida, Davlatimiz rahbarining topshirig‘iga muvofiq, Vazirlar Mahkamasining tegishli qarori bilan isitish mavsumi uchun belgilangan 500 kubometrlik bazaviy me’yor 2025-yil 1-apreliga qadar uzaytirildi”, deyiladi xabarda.

Eslatib o‘tamiz, Vazirlar Mahkamasi qaroriga ko‘ra, imtiyozli davrda (noyabr-fevral oylari) aholi tabiiy gaz uchun quyidagi shkala bo‘yicha to‘lov qilishi belgilangan:

• oyiga 500 kub metrgacha — 650 so‘m;
• oyiga 501 kub metrdan 2 500 kub metrgacha — 1500 so‘m;
• oyiga 2 501 kub metrdan 5 000 kub metrgacha — 1950 so‘m;
• oyiga 5 001 kub metrdan 10 000 kub metrgacha — 2275 so‘m;
• oyiga 10 001 kub metr va undan yuqori — 2600 so‘m.

Qoraqalpog‘iston Respublikasi va Xorazm viloyatida imtiyozli davr oktabr – fevral oylari hisoblanadi.