“Swiss Grow” kompaniyasi O‘zbekistonda charm chiqindilarini qayta ishlashga $2 mln investitsiya kiritadi

Shvetsariyaning “Swiss Grow” kompaniyasi va “O‘zcharmsanoat” uyushmasi charm sanoati sohasida qo‘shma ekologik loyihani ishga tushirishni muhokama qildi, deya xabar bermoqda uyushma matbuot xizmati.

Umumiy qiymati $2 mln bo‘lgan loyiha charm mahsulotlari ishlab chiqarish jarayonida hosil bo‘ladigan chiqindilarni qayta ishlash orqali ularni qishloq xo‘jaligi uchun mineral o‘g‘itlarga aylantirishni nazarda tutadi. Birinchi bosqichda charm chiqindilarining 60%i to‘liq qayta ishlanishi rejalashtirilgan.

Ko‘p hollarda charm zavodlardagi chiqindilar yillar davomida utilizatsiya qilingan yoki yo‘qotilgan, ammo ularning qiymati va imkoniyati ko‘pchilikka noma’lum bo‘lib kelgan, — deyiladi xabarda.

“O‘zcharmsanoat” kompaniyasi ma’lumotlariga ko‘ra, “Swiss Grow” texnologiyalari bir vaqtning o‘zida sanoatning ifloslanishini kamaytiradi va mamlakat qishloq xo‘jaligini mahalliy ekologik toza o‘g‘itlar bilan ta’minlaydi. Bunday yechimlar bir qator rivojlangan mamlakatlar, jumladan, Yevropa davlatlari va Janubiy Koreyada ham muvaffaqiyatli amalga oshirilgan.

O‘zbekiston esa bu gal uni faqat import qilish bilan cheklanmasdan, mahalliy ishlab chiqarish zanjiriga integratsiya qilish niyatida. Bu sanoat va agrar sektorni uyg‘unlashtiruvchi yangi bosqich, “yashil” iqtisodiyotning amaliy ifodasi, deyiladi tashkilot xabarida.

Tomonlar loyihani amalga oshirish tartibi, qonunchilik bazasi va zarur yer maydonlari ajratish masalalarini muhokama qildi.