O‘zbekistonda 2026-yilda sun’iy yo‘ldosh interneti sinovdan o‘tkaziladi

O‘zbekiston 2026-yilda sun’iy yo‘ldosh internet texnologiyalarini sinovdan o‘tkazishni rejalashtirmoqda. Bu haqda Bosh vazir Abdulla Aripov Digital Qazaqstan 2026 xalqaro forumida ma’lum qildi.

Uning so‘zlariga ko‘ra, mamlakatda internet qamrovi so‘nggi yillarda keskin oshib, keng polosali aloqa 41%dan 99,5%gacha yetgan. Shu bilan birga, aloqa kanallarining o‘tkazuvchanligi 40 baravar kengaygan. Endilikda chekka hududlarni ham qamrab olish uchun sun’iy yo‘ldosh interneti sinovdan o‘tkaziladi. Ushbu yo‘nalishda ishlaydigan kompaniyalar uchun soliq imtiyozlari ham ko‘zda tutilgan.

Raqamli davlat xizmatlari tizimi yagona data-markazga markazlashtirilgani natijasida davlat xarajatlari 30%ga qisqargan. Ayni paytda milliy sun’iy intellekt infratuzilmasini yaratish ishlari yakuniy bosqichga yaqinlashgan. Mamlakatda bu yo‘nalishda 100 ta ustuvor loyiha amalga oshirilmoqda.

Misol sifatida Olmaliq kon-metallurgiya kombinati hududida qurilgan yangi mis boyitish fabrikasi keltirildi. Unda ishlab chiqarish jarayonlarini real vaqt rejimida nazorat qiluvchi 20 mingdan ortiq sensorlardan iborat raqamli tizim joriy etilgan.

Shuningdek, O‘zbekistonda sun’iy intellekt bo‘yicha maxsus alyans tashkil etilmoqda va 19 ta ilmiy-ta’lim laboratoriyasi ishga tushirilmoqda.

So‘nggi o‘n yilda mamlakat startap ekotizimi sezilarli rivojlandi: uning bozor bahosi $1 mln darajadan $4 mlrdgacha oshdi. Hozirda 800 ta startap faoliyat yuritmoqda, ulardan 60 tasi xizmat eksporti bilan shug‘ullanadi. Venchur fondlarining umumiy kapitali esa 350 mln dollarga yaqinlashgan.

Islohotlar natijasida O‘zbekiston Jahon bankining davlat boshqaruvida raqamli yetuklik reytingida 9-o‘rinni egalladi.