O‘zbekistonda tadbirkorlar uchun subsidiyalar monitoringi tartibi tasdiqlandi

O‘zbekiston Respublikasi Vazirlar Mahkamasi biznes vakillariga imtiyoz va preferensiyalar berilishini nazorat qilish tartibini belgilovchi qarorni qabul qildi. Bu haqda Savdo-sanoat palatasi matbuot xizmati xabar berdi.

Tasdiqlangan nizomga ko‘ra, moliyaviy yordam ajratuvchi tashkilotlar mablag‘ oluvchi erishishi lozim bo‘lgan aniq maqsadli ko‘rsatkichlarni belgilashi shart. Davlat yordamini taqsimlash va undan foydalanish jarayoni subsidiya.mf.uz elektron platformasi orqali kuzatib boriladi.

Ajratilgan mablag‘larning samaradorligini baholashda soliq va moliyaviy hisobotlar, tarmoq vazirliklari va davlat statistika organlarining ma’lumotlari, shuningdek xo‘jalik yurituvchi subyektning o‘zi taqdim etgan axborotdan foydalaniladi. Samaradorlik tahlili har bir holat bo‘yicha alohida tartibda iqtisodiy, byudjet va ijtimoiy mezonlar asosida amalga oshiriladi.

Hujjat davlat qo‘llab-quvvatlashini qaytarish tartibini ham belgilaydi. Mablag‘lar quyidagi holatlarda qaytariladi:

• tadbirkor shartnomada belgilangan maqsadli ko‘rsatkichlarga erishmagan taqdirda;
• mablag‘larning maqsadsiz yoki samarasiz ishlatilgani aniqlansa;
• yordam olish uchun noto‘g‘ri hujjatlar yoki buzib ko‘rsatilgan ma’lumotlar taqdim etilgani ma’lum bo‘lsa.