“Toshkent” Respublika fond birjasi “Oʻzsanoatqurilishbank” ATBga birja a’zoligiga kiritdi

2025-yil 5-fevral kuni “Oʻzsanoatqurilishbank” aksiyadorlik tijorat banki rasmiy ravishda “Toshkent” Respublika fond birjasi (RFB) a’zoligiga qabul qilindi. Bu haqda birja rasmiy sahifasida ma’lum qildi. 

A’zolik guvohnomasini bank vakillariga RFB boshqaruvi raisi Georgiy Paresishvili topshirdi.

Bankning investitsiya banki departamenti vakillari bu qoʻllab-quvvatlovga minnatdorchilik bildirib, ularning asosiy maqsadi kompaniyalarga investitsiyalarni jalb qilish, fond bozoriga chiqishga tayyorgarlik koʻrish hamda ularni ushbu jarayonning barcha bosqichlarida qoʻllab-quvvatlash ekanini ta’kidladi.

Shuningdek, bankning investitsiya banki departamenti ichki va xalqaro kapital bozorlarida biznes uchun yangi imkoniyatlar yaratish va xizmatlar diversifikatsiyasiga hissa qoʻshayotgani qayd etildi.