Soliq tekshiruvlarini videoga olish tartibi tasdiqlandi

O‘zbekistonda soliq nazorati tadbirlarini videotasvirga olish tartibi belgilandi. Bu haqda Adliya vazirligi xabar berdi.

Hukumat qaroriga ko‘ra, soliq tekshiruvlari davomida jarayon videoga olinadi. Videoqayd soliq obyektlarini hisobga olish, xronometraj o‘tkazish, xodimlar sonining soliq hisobotlaridagi ma’lumotlar bilan mosligini tekshirish kabi holatlarga taalluqlidir.

Shuningdek, nazorat-kassa texnikasi va to‘lov terminallaridan foydalanish, savdo va xizmat ko‘rsatish qoidalariga rioya etilishi ham videoyozuv orqali qayd etiladi.

Videoqayd faqat soliq organi rahbari yoki uning o‘rinbosarining rasmiy buyrug‘i asosida boshlanishi mumkin. Bunda tasvirga olish jarayoni tadbirkorning qonuniy faoliyatiga to‘sqinlik qilmasligi va zarar yetkazmasligi shart.

Tekshiruv yakunida tuziladigan dalolatnomada foydalanilgan qurilmaning rusumi va seriya raqami hamda tasvirga olingan holatlar haqida batafsil ma’lumotlar ko‘rsatiladi.