Senat 2026-yilgi davlat byudjetiga qariyb 41 trln so‘mlik o‘zgartirishlarni ma’qulladi

Bugun, 18-dekabr kuni, O‘zbekiston Oliy Majlisi Senati 2026-yil uchun davlat byudjeti to‘g‘risidagi qonunga o‘zgartirishlar kiritishni ma’qulladi.

Senat majlisida ma’lum qilinishicha, joriy yilgi byudjet xarajatlari 40,9 trln so‘mga oshiriladi. Qo‘shimcha mablag‘lar iqtisodiy o‘sishni qo‘llab-quvvatlash va aholining ijtimoiy himoyasini kuchaytirishga yo‘naltiriladi.

Byudjet xarajatlari qanday o‘zgaradi?

Senator Erkin Gadoyevning ta’kidlashicha, 2026-yil uchun byudjet xarajatlari ilgari tasdiqlangan 281,6 trln so‘m o‘rniga 322,5 trln so‘m etib belgilanishi rejalashtirilmoqda.

Qo‘shimcha ajratilayotgan mablag‘lar quyidagi yo‘nalishlarga sarflanadi:

• 6 trln so‘mdan ortig‘i — ish haqi va unga tenglashtirilgan to‘lovlarga;
• 2,7 trln so‘m — ko‘p qavatli uylarning issiqlik energiyasi samaradorligini oshirishga;
• 1,9 trln so‘m — aholini ijtimoiy qo‘llab-quvvatlashga;
• 1,6 trln so‘m — “Kambag‘allikdan farovonlik sari” dasturiga qo‘shimcha mablag‘ sifatida;
• 3,6 trln so‘m — qishloq xo‘jaligiga;
• 5,8 trln so‘m — markazlashgan investitsiya loyihalariga;
• 4,1 trln so‘m — pensiyalar uchun byudjet transfertlariga;
• 435 mlrd so‘m — tibbiy xizmatlarni moliyalashtirishga.

Senator Gadoyevning so‘zlariga ko‘ra, mamlakatda pensiyalarning o‘rtacha miqdori 1,4 mln so‘mdan 1,6 mln so‘mga oshgan. Bu o‘zgarish ham byudjet xarajatlarining sezilarli ko‘payishiga sabab bo‘lgan.