O‘zbekiston va Rossiya o‘zaro aviaqatnovlar sonini uch barobarga oshiradi

21−22-iyul kunlari Moskvada bo‘lib o‘tgan muzokaralar chog‘ida O‘zbekiston va Rossiya aviatsiya hukumatlari aviaqatnovlar sonini oshirish va parvozlar geografiyasini kengaytirish bo‘yicha kelishuvga erishdi. Bu haqda O‘zbekiston Transport vazirligi matbuot xizmati xabar berdi.

Qayd etilishicha, mazkur kelishuv doirasida har ikki mamlakat aviakompaniyalari barcha parvoz shaharlaridan samarali foydalangan holda haftasiga mingdan ortiq qatnovni amalga oshirish huquqiga ega bo‘ldi. Ayni vaqtda ikki mamlakat o‘rtasida haftasiga jami 310 dan ortiq muntazam aviaqatnov bajarilmoqda.

Ikki davlatning tayinlangan aviakompaniyalariga haftasiga quyidagi miqdordagi reyslarni amalga oshirish huquqi berildi:

• Toshkent — Moskva yo‘nalishida — 50 tadan (jami 100 ta reys);
• Samarqand — Moskva yo‘nalishida — 23 tadan (jami 46 ta);
• Buxoro — Moskva, Urganch — Moskva, Farg‘ona — Moskva, Namangan — Moskva yo‘nalishlarida — har biri 14 tadan (jami 112 ta);
• Toshkent — Sankt-Peterburg, Toshkent — Krasnoyarsk, Toshkent — Sochi yo‘nalishlarida — har biri 14 tadan (jami 42 ta);
• Termiz — Moskva yo‘nalishida — 10 tadan (jami 20 ta).

Bundan tashqari, boshqa barcha shaharlar yo‘nalishlarida 7 tadan, ya’ni Rossiya aviatashuvchilari uchun ularning 80 ta xalqaro aeroportidan O‘zbekistonning barcha xalqaro aeroportlariga jami 560 ta, O‘zbekiston aviatashuvchilari uchun O‘zbekistonning barcha xalqaro aeroportlaridan yuqorida qayd etilganidan tashqari Rossiyaning eng yirik 29 ta xalqaro aeroportiga jami 203 ta aviaqatnovni amalga oshirish huquqi paydo bo‘ldi.

Shuningdek, aviaqatnovlarni amalga oshirish chog‘ida 3 ta parvoz manzilini o‘zida birlashtiruvchi “uchburchak” shakldagi qatnovlarni amalga oshirish doirasida aviakompaniyalar soni bo‘yicha cheklovlar bekor qilindi, har bir kompaniya 5 tagacha shaharni tanlash huquqini oldi.

Vazirlik yangi kvotalar to‘liq qo‘llansa, ikki davlat o‘rtasidagi havo qatnovining yillik hajmi 16 mln yo‘lovchidan oshishi mumkinligini ta’kidladi. 2024-yilda 32,6 ming reys amalga oshirilib, 4,1 mln yo‘lovchi tashilgan.