REM Rossiya kompaniyalariga O’zbekiston bozoriga kirishga yordam beradi

Rossiya eksport markazi (REM) Rossiya kompaniyalariga O’zbekiston bozoriga kirish, biznes yuritish va muzokaralarni tashkil etish masalalari bo’yicha maslahatlar beradi. Bu haqda «RIA Novosti» xabar bermoqda.

Shuningdek, markaz potensial sheriklarni topishga va yuzaga keladigan boshqa muammolarni hal qilishga yordam beradi. Ushbu xizmatlarga «mening eksportim» platformasi orqali murojaat qilishingiz mumkin.

Rossiya kompaniyalari 8-10 oktyabr kunlari Toshkentda bo’lib o’tadigan «HoReCa Expo Uzbekistan 2024» xalqaro ko’rgazmasida ishtirok etishlari mumkin. 

Ushbu tadbir «HoReCa» segmentidagi Rossiya kompaniyalariga o’z mahsulot va xizmatlarini O’zbekiston bozoriga taqdim etish hamda mehmonxona, sayyohlik va restoran biznesining asosiy ishtirokchilari bilan muzokaralar olib borish imkoniyatini beradi.

Ko’rgazmada O’zbekiston «HoReCa» sohasidan 100 ga yaqin eksponent va 3 ming mutaxassis, jumladan mehmonxona va restoran egalari va menejerlari, investorlar, me’morlar, dizaynerlar, oshpazlar, sayyohlik operatorlari va agentliklari ishtirok etishi kutilmoqda.