O‘zbekistonda tibbiy xizmatlarning narxi pasaytirilishi bilan 80 mlrd so‘m tejaldi

Raqobat qo‘mitasi tomonidan davlat ixtisoslashtirilgan tibbiyot markazlari tomonidan kelishish uchun taqdim etilayotgan narxlar vakolat doirasida o‘rganib chiqildi.

Xususan, 2023-2024-yillar davomida respublika davlat tibbiyot markazlarida ayrim xarajatlar optimallashtirilishi hisobiga tibbiy xizmatlarning bazaviy narxlari o‘rtacha 5-20% gacha pasaytirilishi ta’minlangan.

Buning natijasida, 2023-yilda o‘rtacha 60 mlrd so‘m byudjet mablag‘lari iqtisod qilinib, davlat byudjetidan ajratilishi rejalashtirilgan mablag‘lar hisobidan qo‘shimcha 5 ming nafar bemor (28 ming nafar o‘rniga 33 ming nafar bemor)ga tibbiy xizmat ko‘rsatilishi ta’minlandi.

Shuningdek, 2024-yilda esa o‘rtacha 80 mlrd so‘m byudjet mablag‘lari iqtisod qilinishi natijasida, davlat byudjetidan ajratilishi rejalashtirilgan mablag‘lari hisobidan qo‘shimcha 6 ming nafarga yaqin bemorga tibbiy xizmat ko‘rsatilishi ta’minlandi.