O‘zbekistonda QQS tizimi takomillashtirilmoqda

O‘zbekiston Respublikasi Prezidentining 2025-yil 19-avgustdagi PF-138-son farmoniga muvofiq, tadbirkorlar takliflari inobatga olindi. Xususan, mehmonxona xizmatlari sohasidagi soliq siyosatida muhim yangilik kutilmoqda, deb xabar bermoqda Savdo sanoat palatasi.

“Avesta Hospitality” MCHJ (Courtyard by Marriott Tashkent mehmonxonasi) tashabbusiga ko‘ra, bugungi kungacha mehmonxona xizmatlarini ko‘rsatuvchi tadbirkorlik subyektlariga byudjetga to‘langan qo‘shilgan qiymat solig‘ining 20% ini qaytarib olish imkoniyati mavjud edi. Biroq, bu imtiyozdan foydalanish uchun mehmonxona xizmatlaridan tushgan tushum korxonaning umumiy daromadining kamida 90% ini tashkil etishi talab etilardi.

Endi ushbu talab mehmonxonaning yulduzli toifasiga qarab qayta ko‘rib chiqilishi nazarda tutilmoqda. Bu esa turli toifadagi mehmonxonalarga teng imkoniyat yaratib, ularning bozordagi raqobatbardoshligini oshirishga xizmat qiladi.

Vazirlar mahkamasining qarori loyihasiga ko‘ra, QQS to‘loviga o‘tayotgan tadbirkorlar balansida ko‘chmas mulk mavjud bo‘lgan taqdirda, maxsus maqsadlarda ro‘yxatdan o‘tkazilgani to‘g‘risidagi guvohnomani joyida tekshiruvdan o‘tkazmasdan ham olishi mumkin bo‘ladi.

Majburiy asosda QQS to‘lovchisi sifatida e’tirof etilgan shaxslar uchun ham alohida mexanizm nazarda tutilgan: ularga soliq to‘lovchining ishtirokisiz, keyinchalik soliq organlari tomonidan elektron nazorat o‘rnatilgan holda avtomatik tarzda sertifikat beriladi.

Bundan tashqari, Prezident qarori loyihasida qishloq xo‘jaligida QQSni hisoblash va qo‘llashning soddalashtirilgan tartibini joriy etish taklif etilgan.

Qonun va Vazirlar mahkamasining qarorlari loyihalarida tovarlarni milliy va tashqi marketpleyslar (elektron savdo maydonchalari) orqali eksport qilishda soliq to‘lovchilarga to‘langan QQS summasini qaytarish imkoniyati belgilab qo‘yilgan.

Bunday operatsiyalar to‘g‘risidagi ma’lumotlar Bojxona qo‘mitasidan pulni qaytarish huquqlarini tezkor tekshirish uchun avtomatik ravishda Soliq qo‘mitasiga o‘tkaziladi.

Sog‘liqni saqlashning xususiy sektorini qo‘llab-quvvatlash doirasida yillik tovar aylanmasini tahlil qilish asosida tibbiyot muassasalari uchun QQSni qisman qaytarish mexanizmini ishlab chiqish taklif etilmoqda.

Bu tibbiy xizmatlar sohasida yashirin iqtisodiyot ulushini kamaytirish va ularning shaffofligini oshirishga xizmat qilishi kerak.

QQSni qaytarishda shaffoflik

Shaffoflik va nazoratni oshirish maqsadida kontragentlar tomonidan to‘lanmagani sababli QQSni qaytarish rad etilgan taqdirda soliq to‘lovchilarga o‘zlarining shaxsiy kabineti orqali bunday kontragentlar ro‘yxatidan foydalanish imkoniyatini berish taklif etilmoqda.

Bu tezkor choralar ko‘rish va sheriklarni tanlashda xavflarni kamaytirish imkonini beradi.