O‘zbekistonda islom banki to‘g‘risidagi qonun loyihasi ma’qullandi

O‘zbekistonda moliya tashkilotlari faoliyatini islom tamoyillari asosida yuritish uchun huquqiy asos joriy etilmoqda. Bu haqda Oliy Majlis Qonunchilik palatasi matbuot xizmati xabar berdi.

Hujjatda islomiy bank faoliyatini amalga oshirish uchun litsenziya berish mezonlari belgilangan. Shuningdek, unda islomiy moliya operatsiyalarining asosiy tushunchalari va faoliyat tamoyillari izohlangan.

Islomiy standartlar asosida ishlaydigan tashkilotlarga quyidagi huquqlar beriladi:

• mijozlarni moliyalashtirish maqsadida savdo faoliyati bilan shug‘ullanish;
• yuridik shaxslar tashkil etish;
• kompaniyalarda ulush yoki aksiyalar sotib olish.

Deputatlar ta’kidlaganidek, yangilangan soliq tartiblari moliyaviy xizmatlar ko‘lamini kengaytirish imkonini beradi. Ushbu normativ hujjat islomiy moliyani joriy etish uchun huquqiy bazani shakllantiradi. Kutilishicha, bu iqtisodiyotdagi soya sektorini qisqartirishga va xorijiy investitsiyalar oqimini oshirishga xizmat qiladi.

Hujjat deputatlar tomonidan qabul qilinib, Senatga ko‘rib chiqish uchun yuborildi.

Markaziy bank avvalroq lombardlar va faktoring tashkilotlari islomiy moliya xizmatlarini ko‘rsatishiga ruxsat bergan edi. Bunday huquq avvalroq mikromoliya tashkilotlariga berilgan.

Endilikda ular islomiy moliyalashtirishga oid quyidagi xizmatlarni ko‘rsatishi mumkin:

• islomiy ijara;
• muzoraba – foydani taqsimlashga asoslangan moliyalashtirish;
• murobaha – nasiya savdoga asoslangan moliyalashtirish;
• mushoraka – sherikchilik, foyda va zararlarni taqsimlashga asoslangan moliyalashtirish;
• salam – oldindan to‘lovga asoslangan moliyalashtirish.