O‘zbekiston 2026-yilgacha qishloq xo‘jaligini rivojlantirish uchun $115 mlndan ortiq mablag‘ ajratadi

O‘zbekiston 2026-yilgacha qishloq xo‘jaligini mexanizatsiyalash va rivojlantirish uchun $118,5 mln ajratadi. Bu haqida Prezident qarori imzolandi. 

Unga ko’ra, Jahon banki lizing tashkilotlariga “Qishloq xo‘jaligini modernizatsiya qilish” loyihasi doirasida $34 mln, “Farg‘ona vodiysida qishloq tadbirkorligini rivojlantirish” loyihasi doirasida esa $19,5 mln ajratadi. 

Shuningdek, 3 oy ichida Jahon banki bilan  “Qishloq xo‘jaligini modernizatsiya qilish” loyihasi doirasida tayyor bog‘lar va kichik agroloyihalar uchun $65 mln yo‘naltirish masalasi kelishiladi hamda zaruriy qarz shartnomasiga o‘zgartirishlar kiritiladi.

2025-yilning fevral oyiga qadar hududiy hokimliklar qishloq xo‘jaligi texnikasiga ehtiyoji bo‘lgan fermerlarning ro‘yxatini shakllantirishi lozim. Ushbu texnikalar tarkibiga paxta terish mashinalari, lazerli plannerlar va ko‘p funksiyali aniq urug‘ ekish mashinalari kiradi.

Bundan tashqari, 2027-yilgacha paxta terish va bog‘dorchilik kombaynlari, shuningdek, 10 yilgacha bo‘lgan qishloq xo‘jaligi texnikasi utilizatsiya yig‘imidan ozod qilinadi.

Shu jumladan, 2025-yil 1-martdan boshlab yangi traktorlar va kombaynlarning GPS qurilmasi o‘rnatilmasdan davlat ro‘yxatidan o‘tkazilishi va ekspluatatsiyasi taqiqlanadi.