O‘zbekiston qimmatli qog‘ozlar bozori yarim yil ichida 17 barobarga o‘sdi

2025-yilning birinchi yarmida O‘zbekiston qimmatli qog‘ozlar bozoridagi savdo hajmi 12,02 trln so‘mni tashkil etib, o‘tgan yilning shu davriga nisbatan 17 barobar oshdi. Bu haqda “Toshkent” Respublika fond birjasi ma’lum qildi.

Ushbu hajmning deyarli yarmi — 5,80 trln so‘m yoki 48,26% i birja kotirovka ro‘yxatiga kiritilgan vositalar bo‘yicha tuzilgan bitimlarga to‘g‘ri keldi. Savdolarning qolgan qismi listingdan tashqari maydonchada (tashkillashtirilgan birjadan tashqari bozor) amalga oshirildi.

Yarim yil davomida 214,8 ming bitim tuzildi, bu o‘tgan yilga nisbatan 21,69% kamdir. Shundan 181,9 mingtasi listingga kiritilgan qimmatli qog‘ozlarga tegishli bo‘lsa, 32,9 mingtasi listingdan tashqari bozorda o‘tkazildi. Har kuni o‘rtacha 1,7 mingta bitim tuzilib, savdolar hajmi 97,69 mlrd so‘mni tashkil etdi.

Yarim yillik natijalariga ko‘ra, UCI indeksi 2,35% ga pasayib, 639,75 punktni tashkil etdi.

Aksiyalar bozori

Aksiyalar bozoridagi aylanma 5,31 trln so‘mga yetdi, bu o‘tgan yilning shu davriga nisbatan 14 barobar ko‘p. Asosiy hajm naqd pulsiz hisob-kitoblar (FoP maydoni) orqali amalga oshirilgan bitimlarga to‘g‘ri keldi — 5,09 trln so‘m.

Aksiyalar bozorida kunlik o‘rtacha savdo hajmi 43,13 mlrd so‘mni, o‘rtacha bitimlar soni esa 1,4 mingtani tashkil etdi. Aksiyalarning bozor qiymati 0,15% ga o‘sib, 242,77 trln so‘mga yetdi. Shundan 4,09 trln so‘mi erkin muomalada bo‘lgan aksiyalar (free float) hissasiga to‘g‘ri keladi.

Iyun oyi oxiriga kelib, 93 ta aksiya emitentining 135 ta vositasi listingda joylashgan edi.

Obligatsiyalar bozori

Yarim yillikda korporativ obligatsiyalar savdosi hajmi 493,10 mlrd so‘mni tashkil etdi, bu o‘tgan yilning shu davriga nisbatan sakkiz barobardan ko‘p. Ushbu bozorda kunlik o‘rtacha savdo hajmi 4,01 mlrd so‘mni, o‘rtacha bitimlar soni esa 34 tani tashkil etdi.

Kotirovka ro‘yxatiga kiritilgan obligatsiyalarning umumiy bozor qiymati 1,46 trln so‘mni tashkil etdi. Listingda 17 ta obligatsiya chiqarilishi mavjud edi.

Listing

Yarim yillik natijalariga ko‘ra, Birjaning kotirovka ro‘yxatida 101 ta emitentning 152 ta vositasi mavjud edi. Hisobot davrida 11 ta emitentdan 13 ta yangi vosita qo‘shildi: 8 ta aksiya chiqarilishi va 5 ta obligatsiya chiqarilishi.

Listingdan tashqari savdo maydoni

Tashkil etilgan birjadan tashqari bozorda olti oy davomida 32,9 mingta bitim tuzildi, bu 2024-yilning birinchi yarmiga nisbatan 17,33% ko‘pdir. Savdolar hajmi 6,22 trln so‘mni tashkil etib, 23 barobarga oshdi. Bitimlar obyekti 165 ta emitentning qimmatli qog‘ozlari bo‘ldi.

Bitimlar obyekti 165 ta emitentning qimmatli qog‘ozlari bo‘ldi.